Accessibility links

Breaking News

Yon Japonez Ayisyen Fe L'Istwa nan US Open Tenis la


Naomi Osaka bo twofé a apre li ranpote la viktwa sou Serena Williams nan final medam yo nan tounwa Open Tenis Ameriken an.

Jwez tenis Naomi Osaka fe listwa pou Japon Samedi nan Nouyok, le li tounen premye fanm Japonez ki janm ranpote tounwa tenis US Open nan.

Viktwa Naomi ranpote sou vedet Amerikenn Serena Williams la — non selman fe fyete Japon, men tou Ayiti paske papa li, Leonard Francois se yon Ayisyen. Misye se moun Jacmel. Manman’l se yon Japonez ki rele Tamaki Osaka. Li gen yon se tou, ki rele Mari e ki jwe tenis pwofesyonel menm jan ave'l.

Men Bagay

Sepandan, match la pat dewoule san pale anpil. Abit la te wetire youn nan pwen Serena yo apre li te akize’l deske li tap triche paske antrene li, ki tap obseve match la ak spektate yo, tap ba’l konsey.

Sa te vekse Serena - ki reponn abit la ke li pa janm triche nan vi’l e ke li ta pito pedi match la pase li triche.

Serena Williams ap diskete ak abit Brian Earley pandan final feminen tounwa tenis Open Ameriken an.
Serena Williams ap diskete ak abit Brian Earley pandan final feminen tounwa tenis Open Ameriken an.

Mamzel te vekse abit la pi plis — le li te frape raket tenis li sou teren an, epi vinn re-soulve keston triche a ak misye. Apre sa li te akize’l de vole. Abit la deside apre sa pou'l bay Naomi yon match suplemante kom punisyon pou Serena nan dezyem set la. Serena pa janm reprann ni.

Naomi limenm te rete kalm, e li te kontinye jwe meye tenis li, jis tan li rive ranpote set la, e match la - 6-2, 6-4 — pou’l pran koup la.

Naomi Osaka ak manman li, Tamaki Osaka apre li ranpote match final US Open nan.
Naomi Osaka ak manman li, Tamaki Osaka apre li ranpote match final US Open nan.

Akolad ak kritik

Manman’l se premye moun ki te felisite Naomi. Papa’l limenm pat chita bo kote manman’l paske misye gen twop anksyete le pitit li ap jwe -- kidonk li te suiv match la nan yon lot seksyon stad la.

Final féminin US Open nan soulve anpil pale anpil sou Twitter ak Instagram. Fanatik Serena yo plenyen pou di abit la seksis, li rasis, li pa korek.

Men fanatik Naomi yo yomenm, tap selebre ak ke kontan, e yo te kritike le fet ke mamzel patka fete komsadwa akoz tout dram Serena yo.

Prezidan Ayisyen an Jovenel Moise te pami Ayisyen ki te felisite Naomi sou Twitter.

Fanatik Ayisyen yo

Nan stad Arthur Ashe la nan Nouyok, fanatik Ayisyen yo te vole drapo peyi d’Ayiti a ak ke kontan — e yo te félisite jen jwez la ak fanmi’l. Yo pat manke raple nonplis tou ke Naomi se yon Ayisyen-Japonez li ye. Menm si li jwe pou Japon li se fyete Ayiti tou.

An fet nan mwad Oktob ane 2017 la, Naomi t'al vizite Ayiti ak paran li, e li te chante lwanj peyi a. Li te menm rankontre kek jwe Ayisyen, ak responsab Federasyon Ayisyen tenis la.

Serena Williams felicity Naomi Osaka apre mamzel fin bat li nan final US Open nan.
Serena Williams felicity Naomi Osaka apre mamzel fin bat li nan final US Open nan.

Rev timoun, reyalite jenes

Naomi Osaka, ki gen 20 an di, rev li sete toujou pou’l jwe kont Serena Williams nan final US Open nan.

Samdi 8 Septanm nan, rev li tounen reyalite.

Facebook Forum

XS
SM
MD
LG