Konpayi SmartMatic di “gen yon diferans yon milyon vwa ant kantite reyèl moun ki te patisipe nan eleksyon an ak chif gouvènman an anonse a."
Yon konpayi teknolojik ki espesyalize nan bilten vòt elektwonik e ki te suiv de prè eleksyon ki te dewoule nan Venezuela pou chanje konstitisyon an, fè konnen otorite yo te manipile vòt la e manipilasyon sa a chanje omwen yon milyon bilten. Prezidan konpayi teknolojik SmartMatic, Antonio Mugica, deklare:
“Nou konnen --e pa gen okenn dout sou sa-- to patisipasyon an te ba anpil nan eleksyon ki fèk dewoule nan Venezuela pou fòme yon asanble konstitiyant; se yon eleksyon otorite yo te manipile. Daprè estimasyon nou, gen yon diferans yon milyon vwa ant kantite reyèl moun ki te patisipe nan eleksyon an ak chif gouvènman an anonse a."
Misye Mugica, ki pale konsa nan yon konferans pou laprès li bay nan kapital britanik la, Lond, mèkredi 2 out 2017 la, di yon milyon vwa yo se diferans ant kantite patisipan gouvènman an pibliye ak kantite bilten sistèm elektwonik li a te konte. Li refize di si koken gouvènman Maduro a fè a kapab chanje rezilta eleksyon an, paske asanble nasyonal la, ki anba kontwòl opozisyon an, kapab sèvi ak anons konpayi elektwonik la pou l rejte rezilta vòt la.