Misye Trump di: “Lame nou an dwe santre atansyon li sou yon viktwa rapid e total. Li pa kapab sipòte gwo fado asirans medikal moun ki chanje sèks yo...”
Prezidan ameriken an, Donald Trump, anonse lame amerikèn nan pral sispann anwole moun ki chanje sèks yo, e chanjman sa a pral valab pou tout branch jeneralman kèlkonk nan sèvis militè a. Konsa Prezidan Trump ap ranvèse yon politik administrasyon Obama a te mete an plas sa gen yon lane.
Nan deklarasyon Misye Trump pibliye sou kont Twitter li byen bonè mèkredi 26 jiyè 2017 la, li di apre li fin tande opinyon kèk jeneral ak ekspè militè, li pare pou l elimine nouvo pratik ki bay moun ki chanje sèks yo –sètadi gason ki tounen fi, ak fi ki tounen gason- dwa pou yo sèvi nan fòs zame Lèzetazini an. Lidè ameriken an ajoute :
“Manm lame nou an dwe santre atansyon yo sou jan pou yo ranpòte yon viktwa rapid e total; enstitisyon an pa kapab sipòte gwo fado asirans medikal moun ki chanje sèks yo...”