Accessibility links

Avètisman Pyongyang : “Lagè Deja Tabli sou Preskil Kore a”

  • Ekip Sèvis Kreyòl VOA

Avyon konba ameriken k ap patisipe nan egzèsis ak lame Kore di Sid (3 desanm 2017).

Nan Kore di Nò, otorite yo fè konnen yon egzèsis militè Lèzetazini ap fè ansanm ak Kore di Sid lakoz yon "eklatman lagè" sou Preksil Kore a tounen yon "fè reyèl".

Nan yon deklarasyon yon pòtpawòl minisfè afè etranjè Kore di Nò a pibliye jedi 7 desanm 2017 la sou ajans nouvèl l Leta, KCNA, li poze kesyon pou l mande: “Kesyon ki rete pou n poze kounyeka a, se: Kilè lagè a pral eklate? Nou pa swete lagè; men nou pap kouri pou li.”

Kore di Nò lanse avètisman sa a nan moman yon bonbaye ameriken B-1B tap pase sou tèritwa sid-koreyen an nan kad yon egzèsis militè ki kòmanse semèn sa a ant lame Lèzetazini ak lame Kore di Sid la, avèk patisipasyon plizyè santèn avyon degè -pami yo genyen yon gwo kantite nan dènye jenerasyon avyon ki rele "bonbadye Stealth yo", yon kantite otorite ameriken yo pat janm itilize anvan.

Sitwayen Kore di Nò ki t ap bat bravo aprè radyo ak televizyon te bay nouvèl ki te anonse lidè peyi a, Kim Jong Un, te pase lòd pou yo teste nouvo misil balistik entè-kontinantal Hwasong-15, nan jounen mèkredi 29 novanm 2017 la. Moun sa yo te reyini nan estasyon tren Pyongyang nan.
Sitwayen Kore di Nò ki t ap bat bravo aprè radyo ak televizyon te bay nouvèl ki te anonse lidè peyi a, Kim Jong Un, te pase lòd pou yo teste nouvo misil balistik entè-kontinantal Hwasong-15, nan jounen mèkredi 29 novanm 2017 la. Moun sa yo te reyini nan estasyon tren Pyongyang nan.

Egzèsis militè yo fè pati yon woutin kote manm lame amerikèn nan ak lame Kore di Sid la fè antrènman ansanm chak ane. Yap dewoule yon semèn apre Kore di Nò te lanse yon nouvo misil balistik entè-kontinantal puisan ki, daprè espesyalis yo, kapab touche Lèzetazini. Lansman nouvo misil sa a se youn nan plizyè tès rejim Pyongyang nan reyalize ansanm avèk yon seri de tès militè; sa ki reprezante yon vyolasyon sanksyon entènasyonal yo.

XS
SM
MD
LG