Accessibility links

Kongrè Ameriken an Apwouve yon Lwa sou Rediksyon Taks ak Kreyasyon Travay

  • Ekip Sèvis Kreyòl VOA

Prezidan Donald Trump ki tap pale sou pelouz Mezon Blanch la nan Washington avèk yon delegasyon palmantè repibliken bò kote li. Yo tap selebre pasaj nan 2 cham Kongrè a lejislasyon sou gwo refòm nan sistèm fiskal la. (Dat :20 desanm 2017).

Ozetazini, Repibliken yo ap selebre vòt kote tou lè 2 chanm Kongrè a apwouve yon lejislasyon ki pral pote refòm total-kapital nan sistèm taks ameriken an: li pase nan Sena a madi 19 desanm 2017 la, epi yon majorite vote pou li nan Chanm Depite a nan kòmasnman apre-midi jounen mèkredi 20 desanm nan. Se premye gwo viktwa prezidans Trump la ranpòte nan Kongrè a.

Pandan Prezidan Trump tap prezide yon rankont kabinè ministeryèl la nan kòmansman jounen mèkredi a yon ti moman anvan Depite yo te apwouve lejislasyon an, li te deklare:

“Nou ranpòte yon viktwa istorik pou pèp ameriken an. Sa ki nan lwa sa a, se yon kokenn-chenn soulajman pou klas mwayèn nan. Yo pral kòmanse wè rezilta yo depi nan mwa fevriye pwochen. Lwa a se vle di anplwaye yo pral kapab ale lakay yo avèk plis lajan; l ap ofri ameriken kap travay di yo posiblite pou yo achte kado Nwèl pou fanmi yo.”

Prezidan Chanm Depite a, Paul Ryan
Prezidan Chanm Depite a, Paul Ryan

Pou prezidan Chanm Depite a, Paul Ryan, “se refòm fiskal k ap pote plis chanjman, k ap fasilite plis kwasans ekonomik nan peyi nou an depi yon jenerasyon.”

Pojè-lwa sou rediksyon taks ak kreyasyon travay sa a pase nan 2 chanm yo avèk apui total palmantè repibliken yo, tandiske tout demokrat yo vote kont li. Lejislasyon an, ki gen pou l ale devan Prezidan Trump pou siyati, redui an pèmanans taks gwo konpayi yo peye; li redui pwovizwaman “enpo sou le revni” anplwaye ameriken yo, ogmante egzansyon taks yo tandiske li prall ajoute yon trilyon dola soyu dèt nasyonal la pandan yon peryòd 10 zan.

XS
SM
MD
LG