Accessibility links

Breaking News

Prezidan Trump Defann nan Davos Politik ki Baze sou Slogan “Lèzetazini Dabò"


Prezidan Donald Trump ki t ap prezante mesaj li nan Fowòm Ekonomik Mondyal la. (Foto: Davos, Laswis, 26 janvye 2018).

Prezidan ameriken an, Donald Trump, k ap patisipe nan Fowòm Ekonomik Mondyal la nan Davos, nan peyi Laswis, pran lapawòl nan yon rankont ki te resanble divès lidè mondyal nan domèn politik ak biznis, pou l prezante yon defans byen solid pou politik administrasyon n nan ki baze sou slogan “Lèzetazini Dabò”. Nan mesaj sa a, Misye Trump presize lemond kapab benefisye de puisans ekonomik Lèzetazini e li envite delege yo pote-kole avèk li.

Nan yon diskou ki te dire 15 minit, Prezidan Trump di -antwòt:

<< An tan ke prezidan ameriken, m ap plase Lèzetazini dabò, anvan tout bagay, menm jan lòt lidè mondyal ta dwe fè sa pou peyi yo. Chak fwa Lèzetazini fè pwogrè ekonomik, lemond tou fè pwogrè ekonomik. >>

<<Pwosperite Lèzetazini kreye yon kantite job san limit a travè lemond; an menm an tou, yon detèmitasyon pou ekselans, kreyativite ak inovansyon nou devlope Ozetazini debouche sou dekouvèt enpòtan ki ede pèp yo tout kote sou latè viv yon vi ki gen plis pwosperite ak yon pi bòn sante. Lèzetazini se yon peyi ki ouvè pou biznis e, yon fwa ankò, nou se yon peyi konpetitif. >>

Prezidan Trump avèk Premye Minis britanik la Theresa May nan Fowòm Ekonomik Mondyal la nan Davos. (Foto: 25 janvye 2018).
Prezidan Trump avèk Premye Minis britanik la Theresa May nan Fowòm Ekonomik Mondyal la nan Davos. (Foto: 25 janvye 2018).

Tankou Misye Trump toujou fè sa pandan tout karyè li, li pa prezante okenn ekskiz pou le fèt ke li elimine anpil akò komèsyal ak lòt kalte antant Lèzetazini te siyen depi li panse akò ak antant sa yo kapab ralanti kwasans ekonomi amerikèn nan. Se konsa li deklare:

<< Nou pare pou n aplike lwa sou komès nou yo e nou pral retabli entegrite nan sistèm echanj komèsyal la. Se si –e sèlman si nou ensiste sou echanj komèsyal ki jist e ki balanse, nou va kapab kreye yon sistèm ki bay bon rezilta non sèlman pou Lèzetazini, men pou tout peyi. >>

Prezidan Donald Trump (adwat) ak Prezidan peyi Wannda a, Paul Kagame, nan yon rankont bilateral yo fè a-pa pandan yo prezan nan Davis pou yo patisipe nan Fowòm Ekonomik Mondyal la (Foto: 26 janvye 2018, Davos, pati lès Laswis/AFP/Nicholas Kamm).
Prezidan Donald Trump (adwat) ak Prezidan peyi Wannda a, Paul Kagame, nan yon rankont bilateral yo fè a-pa pandan yo prezan nan Davis pou yo patisipe nan Fowòm Ekonomik Mondyal la (Foto: 26 janvye 2018, Davos, pati lès Laswis/AFP/Nicholas Kamm).

Nan menm mesaj la, Prezidan Trump lanse yon apèl bay lidè mondyal ki rasanble nan Davos yo pou l mande yo travay pi etwatman avèk Lèzetazini nan pataje objektif ki gen rapò ak sekirite; pami okjektif sa yo genyen viktwa sou Gwoup Eta Islamik la, antant pou mete plis presyon sou Kore di Nò pou jwenn deniklearizasyon Preskil Kore a ak lit kont teworism sou tout fòm ak tout varyete.

XS
SM
MD
LG