Nan Siri, gouvènman an refize kite yon misyon imanitè Nasyonzini antre nan vil Daraa, nan pati sid peyi a.
Se nan vil sa a gouvènman an te lanse prensipal operasyon sere-boulon kont militan ki te òganize pwotestasyon anti-gouvènmantal ki te kòmanse nan mwa mas pase a.
Chèf ajans l’ONU ki regle afè imanitè a, Valérie Amos –ki tap pale de kesyon an lendi 9 me a-- fè konnen gouvènman siryen an bay garanti misyon an ap jwenn pèmisyon pou l ale nan vil la pi ta nan semèn nan.
Daprè yon pòt-pawòl l’ONU, Farhan Haq, semèn pase a prezidan siryen an, Bashar al-Assad, te genyen yon konvèsasyon telefonik ak sekretè-jeneral Nasyonzini an, Ban Ki-moon -konvèsasyon kote li te montre li gen volonte pou l kite yon misyon òganizasyon mondyal la ale nan Daraa.