Accessibility links

Breaking News

Serena Williams, Rafael Nadal: Rèn E Wa All England Club 2010 la Nan Wimbledon


Nimewo 1 mondyal, chanpyòn an tit e tèt de seri nimewo 1, Amerikèn Serena Williams ak Espayòl Rafael Nadal, ranpòte samdi 3 ak dimanch 4 jiyè a tounwa Wimbledon 2010 la pou montre, omwen pou sezon sa a, yo se 2 meyè jwè sou sèn mondyal la nan kategori pa yo. Serena elimine san pitye Ris Vera Zvonareva 6-3, 6-2 pou l dekwoche katriyèm tit All England Club li nan vil Londres, ann Angletè−13 zyèm nan karyè li.

"Sacre" sa a ede amerikèn nan kraze rekò konpatriyòt li Billie Jean King ki te ranmase 12 tit anvan li retire kò li nan konpetisyon. Men rekò a toujou rete nan men Ostralyèn Margaret Court (24) Almand Steffi Graf (22) ak Martina Navratilova (18).

Se vre, palmarès King ak Graf la sanble difisil pou yon atlèt bat, men li pa enposib pou Williams, k ap gen 29 van an septanm, egalize ou menm depase Navratilova vè ane 2012 si li kontinye jwe tenis ak menm pasyon li montre pandan 2 ane ki sòt pase yo. Pandan peryòd sa a, li pran 2 tit Wimbledon, 2 Ostrali ak yon US Open. Serena genyen kounye a yon tit chanpyòn Wimbledon anmwens gran sè li, Venus, ki pran 5 twofe deja sou gazon angle a.

Sepandan, 2 sè Williams yo ase konsistan pou sa ki konsène prezans ak prestasyon yo nan final tounwa britanik la, kote yo ranpòte a yo de a 9 sou 11 dènye final yo. Pandan 15 jou tounwa a, Serena pa janm pèdi yon sèt e li reyalize yon rekò 89 "as" antou e 9 nan final la kont Zvonareva, 21nyèm mondyal, ki pral klase apati lendi nimewo 9 mondyal.

Bò kote pa li, Espayòl Rafael Nadal (nimewo 1 mondyal) fè yon sèl bouche dimanch ak Tchèk Tomas Berdych ke l kale nan 3 sèt 6-3, 7-5, 6-4 dimanch pou l dekwoche 8 tyèm tounwa Gran Chelèm li e dezyèm tit chanpyon li nan Wimbledon. Ane pase, li pat kapab defann tit li a akòz yon pwoblèm jenou ki t ap trakase li. Pandan 8 mwa, li pa janm genyen yon grenn tounwa e pèdi tit nimewo 1 modyal la pou Suis Roger Federer.

Ane sa a, Nadal tounen, li ranpòte 24 match afile, repran tit chanpyon Roland Garros la, ak tit nimewo 1 mondyal la mwa pase. Dimanch 4 jiyè a li mete men sou twofe All England Club la apre yon viktwa majistral sou Tchèk Tomas Berdych ki te elimine Federer nan kar de final yo.

Donk, se ak anpil satisfaksyon Rafa selebre viktwa sa a ki remete l an konpetisyon ak Roger Federer, non sèlman pou konble eka ki separe yo nan kantite twofe yo chak pran men sitou pou tit pi gran jwè tenis ki janm evolye sou planèt la. Fò n siyale se premye fwa depi 2002 Roger Federer pa jwe yon final Wimbledon. Rafael Nadal lwen dèyè Suis la (16) nan domèn twofe a. Men tit chanpyon dimanch lan mete l pami anpil gran jwè ki te pratike spò sa a pandan 30 dènye ane yo. Ak 8 tit, li depase Ameriken John Mc Enroe e lipat pou pat ak André Agassi, Jimmy Connors ak Ivan Lendl.

Apre kouwònman sa a, fanatik tennis yo kounye a ap tann Queen Serena The Fourth–jan jounal britanik The Observer/Guardian rele Serena Williams pou triyonf wololoy (impréssionnant) samdi dènye a nan Wimbledon, ak El Rey Rafael, Primero, nan dènye tounwa Gran Chelèm ane 2010 la, US Open nan, ki dwe tanmen nan fen mwa Out la nan Nouyòk.

Men klasman 10 premye jwèz mondyal Asosyasyon Tenis Medam yo (WTA-SOURCE)

1 Serena Williams (USA) 8475.00pts

2 Jelena Jankovic (Ser) 5900.00

3 Caroline Wozniacki (Den) 5630.00

4 Venus Williams (USA) 5606.00

5 Samantha Stosur (Aus) 4890.00

6 Elena Dementieva (Rus) 4670.00

7 Kim Clijsters (Bel) 4510.00

8 Francesca Schiavone (Ita) 4425.00

9 Vera Zvonareva (Rus) 3965.00

10 Na Li (Chn) 3756.00

Klasman 10 premye jwè mondyal yo (Source ATP) :

1 Rafael Nadal (Spa) 10745.00pts

2 Novak Djokovic (Ser) 6905.00

3 Roger Federer (Swi) 6885.00

4 Andy Murray (Gbr) 5155.00

5 Robin Soderling (Swe) 4935.00

6 Nikolay Davydenko (Rus) 4740.00

7 Juan Martin Del Potro (Arg) 4350.00

8 Tomas Berdych (Cze) 3845.00

9 Andy Roddick (USA) 3490.00

10 Fernando Verdasco (Spa) 3475.00

XS
SM
MD
LG