Sena ameriken an apwouve, lendi 26 septanm 2011 la, yon pwopozizyon-lwa ki kapab kontinye finanse travay gouvènman an e evite biwo Leta federal yo fèmen lè ane fiskal aktyèl la va rive nan bout li vandredi 30 septanm nan.
Sena a –ki anba kontwòl Pati Demokrat la- vote 79 POU e 12 KONT pou apwouve rezolisyon an ki ka pèmèt gouvènman an kontinye travay rive jous nan dat 18 novanm. Pi fò repibliken nan Gran Kò a dakò ak pwopozisyon-lwa a –pami yo genyen lidè minorite a, Mitch McConnel- menm si dokiman an pa fin sanble ak yon lòt sou menm kesyon an ki te pase nan Chanm dè Reprezantan an e ke Sena a rejte.
Sepandan, Misye McConnel kritike Demokrat yo deske yo fòse Sena a rete travay pou yo jwenn yon rezilta ki pa tèlman twò diferan ak sa Kongrè a te jwenn ak pwopozisyon-lwa Chanm Depite a te vote a.
Senatè McConnel di :
“Daprè mwen, tout egzèsis nou fè la a, se yon travay ki totalman pat nesesè. Men, mwen kontan deske nou rive pase rezolisyon an.”
Kounyela a sèl pwoblèm ki poze, se pou Chanm Depite a apwouve pwojè-rezolisyon Sena a vote a. Tankou lidè majorite demokrat la nan Sena a, Harry Reid, di l la, depite-yo an vakans pou le moman e li pa sanble yo pral gen tan retounen nan Kongrè a anvan fen ane fiskal la pou yo vote sou dokiman an e otorize dekesman plis fon lajan pou fonksyonnman gouvènman an.
Senatè Harry Reid di :
"Pandan nap pale la a, Chanm dè Reprezantan an pa la. Depite yo pati deja, yo pa nan Washington. Li vrèman difisil pou w negosye avèk moun kip a prezan."
Youn nan solisyon posib yo, se pou yon ti kantite manm Chanm Depite a ta reyini semèn sa a nan Washington pou yo pwolonje finansman Leta federal la pou jous lendi 3 oktòb la, jou kote tout depite yo ap retounen nan Kongrè a. Jou sa a, yo ta kapab vote pou yo apwouve pwolongasyon 6 semèn pwojè-rezolisyon Sena a bay gouvènman an pou l kontinye fonksyone.
Si sa fèt, Leta federal ameriken tap gen lajan pou l travay rive jous nan mitan mwa Novanm nan; apre sa batay sou bidjè nasyonal la kapab rekòmanse ant Repibliken yo avèk Demokrat yo nan Kongrè a.