Nan moman polis nasyonal Ayiti ap redi pou lite kont gang yo, yon dezakò ant Repiblik Dominikèn ak Kanada te vinn piblik Vandredi. Sa konplike pi plis jefo entènasyonal ki sou pye pou ranfòse PNH la.
Yon jou apre Minis Afè Etranjè Kanadyèn nan Melanie Joly te anonse plan Kanada genyen pou l tabli yon biwo Kanadyen pou kowodone sipò pou polis nasyonal Ayiti a pandan sezon ete a nan Repiblik Dominikèn, tokay Dominiken li demanti gen okenn antant konsa ant 2 peyi yo pou otorite etablisman yon biwo sou teritwa Dominiken.
Nan yon mesaj li pibliye sou rezo sosyal yo, Minis Afè Etranje Roberto Alvarez deklare pa okenn antant e ke gouvènman Dominiken an poko menm diskite yon plan konsa.
Nan yon deklarasyon li te bay Reuters pi ta, ministè afè etranjè Kanadyen an te di li kontinye ap travay ak 20 peyi ak oganizasyon entènasyonal pou ranfòse lapolis Ayisyen an epi ogmante sekirite a. Li ajoute negosyasyon ap kontinye pou "finalize yon lye ki va apiye travay gwoup la yon kote ki sitye tou pre Ayiti."
Deklarasyon an pa di si lye a se pral Repiblik Dominikèn, ki pataje zile a ak Ayiti.
Relasyon ant Repiblik Dominikèn ak Ayiti pa bon depi kèk tan. Depi zak vyolans yo ogmante an Ayiti ane pase a, Sen Domeng ogmante sekirite a sou fwontyè a epi depòte plizyè dizèn milye Ayisyen kap kouri pou kriz la nan peyi yo.
Jedi, Joly te anonse plan Kanada genyen pou kowodone yon operasyon pou apiye lapolis Ayiti depi yon baz nan Repiblik Dominikèn e li te remèsye Alvarèz pou konstantman li, dapre transkri yon responsab gouvènman Kanadyen an bay Reuters.
Depi ane pase a, Premye Minis Ariel Henry ap mande pou yon fòs entènasyonal entèveni an Ayiti pou ede peyi a kwape gang yo. Gang yo kontwole yon gwo pati peyi a kounyea, e sa agrave yon kriz imanitè epi fòse plizyè dizèn milye Ayisyen kouri kite kay yo.
Etazini ankouraje Kanada pou l jwe yon wòl lidè nan jefò a, men pa gen okenn dat pou yon bagay konsa fèt e okenn peyi pa ofri pou yo dirije fòs entènasyonal la.
