Accessibility links

Rankont Prezidan Obama ak Responsab Kompayi Petwòl BP

  • Lionel Desmarattes

Prezidan direktè jeneral konpayi petwòl BP (British Petroleum), Tony Hayward, genyen pou l prezante jounen jedi 17 jen an devan manm kongrè ameriken an pou l deklare konpayi an pa pral pran repo toutotan li pa mete kontwòl sou gwo kokenn fuit petwòl kap lage gaz depi preske 2 mwa deja nan Gòlf Meksik la --yon gaz kap sòti nan yon pui petwòl kri konpayi an posede tou prè kòt eta ameriken ki nan sid peyi a.

Misye Hayward, ki deja prepare depozisyon li pral fè nan kongrè a, deklare fuit petwòl la ba li, li menm pèsonèlman, gwo pwoblèm e konpayi a pare pou l pran responsablite l e fè fas ak tout konsekans sitiyasyon sa a genyen sou anviwonnman an e sou ekonomi rejyon Gòlf la. Yè mèkredi a PDG konpayi a ak kèk lòt gwo zotobre nan BP te rankontre ak prezidan Barack Obama nan La Mezon Blanch; nan okazyon an responsab BP yo anonse yap mete sou kote yon fon lajan 20 milya dola pou dedomaje tout moun ak pwopriyetè biznis ki viktim akoz fuit petwol la. Aprè rankont sa a ki te dire 4 trè d tan, Prezidan Obama te pale ak laprès.

Prezidan Obama di : “20 milya dola sa a pote yon bon jan asirans BP ap satisfè demand viktim yo , anplwaye ak biznis yo. Li enpòtran tou pou n ensiste sou fèt ke lajan sa a pa reprezante yon sòm limit, se pa yon sòm maksimòm. Mwen bay moun kap viv nan rejyon Golf la garanti BP pral respekte obligasyon li genyen anvè yo.”

Pandansetan, Depatman Enteryè Lèzetazini an ---ki nan tèt tout ajans kap jere kesyon anviwonnman ak resous natirèl peyi a--- mande pou otorite yo ouvri yon lòt ankèt sou rezon ki te pwovoke eksplozyon nan pui petwòl la, eksplozyon ki lakoz tout dega sa yo nan rejyon Gòlf la. Daprè enspektè jeneral Depatman an, Mary Kendall, moun ki tap mennen yon premye ankèt sou dosye a, pa gen kalifikasyon legal pou yo fè yon travay kredib e profesyonèl.

XS
SM
MD
LG