Prezidan ameriken an, Barack Obama, ap kontinye yon virewon nan otobis l ap fè nan pati sant-wès peyi a (The Middle West) kote l ap eksplike politik ekonomik li a nan moman l ap reyaji sou kritik ki di kòmkwa li pa fè ase efò pou l ede ekonomi an rekanpe sou 2 pye l, ni li pa pran dispozisyon ki nesesè pou l desann to chomaj la ki wo anpil.
Prezidan Obma genyen pou l asiste yon fowòm ekonomik riral nan eta Iowa, yon jou apre li te pale ak moun zòn nan e ak moun Eta Minnesota. Prezidan Obama deklare lendi l ap fè preparasyon pou l mete devan Kongrè a yon plan relans pou ekonomi peyi a lè depite yo ak senatè yo va retounen nan travay nan mwa septanm nan.
Mesye Obama te lanse yon apèl bay Kongrè a pou mande l pwolonje aplikasyon lwa sou rediksyon taks sou sale yo, aji sou lwa sou komès yo e vote lwa pou kreye djòb. Eta Iowa benefisye yon gwo atansyon politik depi kèk jou deja, apre rezilta yon sondaj ki te soti samdi e ki montre se youn nan eta prefere nan mitan kandida Pati Repibliken an pou eleksyon prezidansyèl ki gen pou dewoule nan ane 2012 la.