Accessibility links

Anbasadè Ameriken, David Pressman, Mande Aktè Politik Ayisyen yo Travay pou Aplike Rès Akò 5 Fevriye 2016 la.

  • Ekip Sèvis Kreyòl VOA

Anbasadè Adjwen Lèzetazini nan Nasyon Zini, David Pressman.

Nan yon mesaj reprezantan adjwen Lèzetazini nan l'ONU, Anbasadè David Pressman, mete devan konsèy Sekurite a, nan jounen yè jedi 17 mas 2016 la, li di li apresye rapò Anvwaye Espesyal Sekretè Jeneral la, Madam Sandra Honoré, ak Sekretè Jeneral la li-menm, prezante sou sitiyasyon an ann Ayiti. Misye Pressman mete aksan sou pwogrè peyi d Ayiti reyalize depi tranblemanntè janvye 2010 la, men li ensiste pou l di travay la poko fini. Reprezantan adjwen Lèzetazini nan l'ONU an deklare :

“Jounen jodi a, mwen ta renmen nou santre atansyon nou sou yon sijè imedya ki enpòtan anpil pou avni peyi d Ayiti -sètadi konklizyon san pèdi tan pwosesis elektoral ki ranvwaye a. Efò pou konplete plan elektoral sa a, se yon pa an avan trè-trè zenpòtan sou wout pou non sèlman enstale yon gouvènman eli ki reflete volonte pèp ayisyen an, men tou pou retabli totalman enstitisyon demokratik fonksyonèl yo ann Ayiti, enstitisyon ki kapab fè peyi a vin pi stab epi gen plis sekirite. San ranfòsman enstitisyon demokratik yo ak yon pwosesis demokratik ki merite konfyans, pap janm kapab genyen yon stabilite veritab ak yon devlopman dirab nan peyi d Ayiti.

"Tankou Reprezantan Espesyal Sekretè Jeneral la te di sa a, yon pwosesis politik entè-ayisyen rive jwenn yon akò politik nan dat 5 fevriye a pou yon 2èm tou eleksyon prezidansyèl yo dewoule nan dat 24 avril la epi pou yon prezidan prete sèman le 14 me. Pou kalandriye sa a kapab respekte, tout pati prenant yo ann Ayiti dwe pran angajman pou yo aplike akò sa a rapidman. Pou sa fèt, nou byen akeyi angajman Prezidan Pwovizwa a a, Misye Privert, pran pou l avanse sou wout reyalizasyon pwosesis elektoral la jan akò a prevwa l la, e nou atire atansyon sou bon pa an avan li te fè nan dat 25 fevriye a lè li te nonmen yon nouvo Premye Minis.

“Sepandan, alòske gen pwogrè ki fèt nan efò pou respekte kalandriye sa a, preske pa rete tan ankò pou reyalize tout pwen sa yo. Yon pa enpòtan se fòmasyon Konsèy Elektoral Pwovizwa a le pi vit posib. Nou lanse yon apèl bay palman an pou l jwe wòl pa l nan reyalizasyon akò 5 fevriye a; pou l fè sa, li dwe vote deklarasyon politik jeneral Premye Minis la san pèdi tan, yon fason pou fasilite reyalizasyon total pwosesis elektoral la.”

XS
SM
MD
LG