Accessibility links

Breaking News

Peken Konsidere Demokrasi Amerikèn nan kòm "Yon Zam Destriksyon Masif"


Video sa a te fèt le 25 janvye 2021. Li te sou sitweb Fowòm Ekonomik Mondyal kote li mpntre Prezidan chinwa a, Xi Jinping, ki te pran lapawòl nan Peken pou l te inogire fowòm nan ki te dewoule vityelman. An jeneral se nan vil Davos, nan Laswis, fowòm sa a dewoule.

Samdi 11 desanm 2021 an, Peken te di li konsidere demokrasi amerikèn nan kòm "yon zam destriktion masif". Lachin fè deklarasyon sa a apre prezidan ameriken an, Joe Biden, te òganize yon somè sou demokrasi ki te rasanble lidè plizyè peyi nan lemond.

Pòtpawòl Minis Afè Etranjè Chinwa a fè yon deklarasyon ki parèt sou entènèt, kote li di "depi lontan Demokrasi tounen yon "zam destriksyon masif" ke Etazini itilize pou mele nan zafè enteryèn lòt peyi yo. " Pòtpawòl la akize Washington tou deske l ap pouse dife pou l pwovoke revolisyon nan peyi etranje".

Etazini pa t envite ni Larisi ni Lachin ni menm La Ongri nan somè vityèl sou Demokrasi li te òganize jedi 9 ak vandredi 10 desanm 2021 an. Lachin akize Etazini deske l ap kreye divizyon ideyolojik ki te a la mòd pandan Lagè Frèt la.

Pòtpawòl diplomasi chinwaz la asiste pou l di yo te òganize somè a pou "simaye prejije ideyolojik epi ankouraje divizyon ak konfwontasyon".

Anvan dat somè a te rive, Peken te ogmante yon kanpay pwopagann kont sistèm demokratik la ki, daprè otorite chinwa yo, reprezante koripsyon ak yon echèk.

Nan yon kaye blan rejim kominis chinwa a te pibliye semèn pase a pou ranfòse lejitimite li, rejim kominis la, ki vin de plizanpli otoritè sou prezidans Xi Jinping, fè lwanj pou pwòp modèl li a ke li prezante kòm "demokrasi entegral pèp la".

Tansyon k ap devlope ant 2 pi gwo puisans ekonomik yo nan lemond vin pi grav nan dènye ane yo akoz yon seri konpetisyon y ap fè nan domèn komèsyal la ak domèn teknolojik la, kesyon dwamoun ak mezantant sou rejyon Xinjiang avèk Taywann.

Vandredi pase a, Depatman Trezò ameriken an te sanksyone 2 ansyen ofisyèl chinwa paske yo te vyole dwamoun nan rejyon Xinjiang epi depatman an mete lis nwa ofisyèl ak anplwaye konpayi espyonaj atifisyèl chinwa "SenseTime" ki fabrike teknoloji rekonesans vizaj ke li itilize kont minorite Ouyghur la.

Joe Biden te envite nan Somè pou Demokrasi a il Taywann, ke Lachin reklame kòm yon pati nan pwòp tèritwa l. Peken konsidere li tankou yon pwovens rebèl e otorite yo nan peyi Lachin te konsidere envitasyon an kòm yon pwovokasyon.

Sepandan Peken konsidere kòm yon viktwa le fet ke, pandan dewoulman somè pou demokrasi Prezidan Biden t ap òganize a, otorite yo nan peyi Nikaragwa te deside koupe tout relasyon diplomatik ak Taywan an pou yo bay Lachin rekonesans la pou la.

Apre anons Nikaragwa, Taywann rete sèlman 14 alye diplomatik. Kòm repons, Depatman Deta Ameriken an mande "tout peyi ki bay enstitisyon demokratik yo valè" pou yo "agrandi angajman yo" ak zile a.

XS
SM
MD
LG