Accessibility links

Breaking News

Pap Franswa Priye ak 150 Mil Fidèl sou 2èm Jounen yon Vizit nan Chili


Pap Franswa ki t ap beni yon bebe nan Prizon San Joaquin nan Santyago Chili.
Pap Fanswa chante yon mès an plennè mèkredi 17 janvye 2018 la nan vil Temuco, nan peyi Chili, kote li rive sou 2èm jou konplè yon vizit sou sou-kontinan sid-ameriken an. Temuco twouve li nan mitan yon konfli k ap bouyi depi plizyè santèn dane sou kesyon pou konnen kiyès ki pwopriyetè anpil teren nan zòn nan: èske se endijèn yo oubyen nouvo veni ki te pran tè sa yo men men natif-natal peyi a nan kòmansman 20èm syèk la. Souvren Pontif la deklare “anpil vyolasyon dwwamoun grav” te dewoule nan zòn sa a.
Aprè Pap la te fin priye avèk yon foul anviwon 150 mil moun, li fè konnen bote natirèl rejyon Araucania a, nan sant Chili, te resevwa benediksyon Bondye, men apre sa li sibi anba malidiksyon lèzòm.
Mès an plennè a dewoule nan Baz Ayeryèn Maquehue a, ki te bati sou tè otorite yo te sezi nan men pèp endijèn Mapuche a e li te sèvi tou kòm yon prizon sou diktati Jeneral Augusto Pinochet a ki te sou pouvwa a ant 1973 e 1990. Pap la fè konnen: “Nou dedye mès sa a pou tout sila yo ki te soufri e ki te mouri; e pou sila yo ki, chak jou, ap pote fado tout enjistis sa yo.”
Pap Franswa ki t ap rive nan Baz Ayeryèn Maquehue kote li selebre yon mès an plennè nan vil Temuco, o Chili, nan dat 17 janvye 2018 la.
Pap Franswa ki t ap rive nan Baz Ayeryèn Maquehue kote li selebre yon mès an plennè nan vil Temuco, o Chili, nan dat 17 janvye 2018 la.
Detanzantan konfli k ap devlope depi lontan deja nan rejyon Araucania a debouche sou vyolans, tankou sa ki te fèt kèk èdtan sèlman anvan mès la te dewoule: yon pati nan lekòl ak yon legliz nan vil Collippuli ki tou prè a, boule. Semenn pase a, bonm dife te eklate nan 10 legliz katolik -pi fò nan yo twouve yo nan rejyon Araucania a kote anpil nan yon milyon desandan pèp Mapuche a ap viv.
Pèsonn moun ni gwoup moun pa pran responsablite pou zak vyolans sa yo; lapolis pa poze okenn arestasyon non plis. Men nan 2 zou 3 mwa ki pase yo militan Mapuche yo te mete dife nan anpil legliz pou yo fè pwomosyon pou koz yo a. Se konsa pap la lanse apèl ba yo pou l mande yo renonse ak vyolans. Sen Pè a di: “Nou pa kapab sèvi ak vyolans pou nou detwi zòt; paske vyolans ak destriksyon debouche sou plis vyolans ak plis destriksyon.” Franswa mande gouvènman chilyen an ale pi lwen ke siyati bèl akò; men fè efò pou l mete yo an aplikasyon.
Pap Franswa se yon sitwayen peyi Ajantin e se premye siksesè Sen Pyè ki te pran nesans nan Amerik Latin nan. Li espere vwayaj sa a -k ap mennen li nan peyi Pewou tou e k ap dire yon semèn- pral sèvi pou reveye konsyans lemond sou sò pèp endijèn yo.
XS
SM
MD
LG