Accessibility links

Opinyon Grand Puisans Yo Sou Pwosesis Lapè Mwayen Oryan an

  • J. Lyonel Desmarattes

Anvwaye espesyal Lèzetazini nan Mwayen Oryan an, George Mitchell, prale nan peyi Izrayèl madi 28 septanm 2010 lanan kad efò Washington ap fè pou l ogmante presyon an sou lidè izrayelyen e palestinyen pou yo kontinye negosyasyon lapè yo, aprè desizyon gouvènman izrayelyen an pran pou l leve entèdiksyon konstriksyon li te enpoze nan pepleman jwif yo nan Si-Jòdani.

Jiskaprezan Pouvwa Palestinyen an reyaji ak gwo kontwòl sou li; sepandan Prezidan Mahmoud Abbas, ki t ap abòde dosye a lendi 27 septanm 2010 la pandan yon visit nan vil Pari, di li pap kouri pran yon desizyon sou kesyon pou konnen eske li pral kontinye negosyssyon lapè dirèk yo ak izrayèl oubyen si li pral vire do kite yo.

Vrèman vre, Misye Abbas, ki t ap bay yon konferans pou laprès ansanm ak prezidan fransè a, Nicholas Sarkozi, deklare li dwe pran kontak ak tout pati ki konsène nan negosyasyon yo anvan pou li pran yon desizyon.

Pòtpawòl Depatman Deta a, P.J. Crowley, ki t ap abòde menm kesyon an nan koulis Asanble Jeneral l’ONU nan New York, di Lèzetazini byen apresye le fèt ke Pouvwa Palestinyen an montre moderasyon nan reyaksyon n nan.

Misye Crowley di: “Pwosesis la enpòtan, li menm vital. Tankou pati konsène yo byen konnen sa, si pa gen negosyasyon dirèk, Izrayèl pap gen sekirite li bezwen an e ke li byen merite ; epi palestinyen yo pap genyen Eta endepandan yo bezwen an e ke yo byen merite.

Kidonk, yon fason oubyen yon lòt, pati yo dwe jwenn yon jan, yon mannyè pou yo kontinye negosaysyon dirèk yo."

Nan menm moman an minis afè etranjè britanik la, William Hague, te gen pou bay opinyon pa l tou sou dosye izrayelo-palestinyen an.

"La Grand Betay panse li trè enpòtan pou moratwa, stop ki te bloke konstriksyon nan pèpleman yo kontinye, pou li rete ann aplikasyon. Sa afekte kredibilite negosyasyon yo, sa nui vyabilite kontak dirèk yo. Alòs, nou espere Izrayèl va pwolonje entèdiksyon ki bloke konstriksyon yo."

Bò kote pa l, Minis afè etranjè fransè a, Bernard Kouchner --reprezantan yon gouvènman ki deja envite izrayèl ak Pouvwa Palestinyen an nan yon konferans sou lapè nan vil Pari-- fè laprès konnen li twò bonè pou moun kouri di negosyasyon dirèk yo ap travèse yon kriz.

Misye Kouchner di: "Yè, pat genyen okenn blokis nan negosyasyon yo nan jounen lendi a.

Pat gen okenn gwo ensidan. Patisipan yo ap pouswiv pwosesis lapè a e y ap tann rankont Lig Arab la samdi. Mwen panse prezidan Abbas fè prèv sajès lè li di nou yè ke se pa fen negosyasyon lapè yo; e mwen panse tou Premye-Minis Netanyahu fè prèv sajès lè misye bay moun ki sou pèplemen yo konsèy pou yo pa prese rekòmanse bati."

Menm jou lendi a, chèf diplomasi amerikèn nan, Sekretè-Deta Hillary Clinton, te kontinye fè konsiltasyon sou evolisyon sitiyasyon an nan Mwayen Oryan an.

XS
SM
MD
LG