Accessibility links

Breaking News

Ayiti Politik - Yon Nouvo Kabinè Ministeryèl Enstale san Claude Joseph


Minis Afè Etranjè ayisyen Claude Joseph te pale ak Jacquelin Belizaire nan studyo Vwadlamerik nan Washington, Madi 2 novanm 2021.

Premye Minis Ariel Henry ranplase Claude Joseph kòm minis afè etranjè. Jean Victor Jénéus se nouvo chèf diplomasi ayisyèn nan.

Claude Joseph te okipe pandan yon ti tan pòs Premye Minis pwovizwa peyi a apre yo te fin touye Prezidan Moïse 7 jiyè 2021 an. Answit, li te retounen nan plas li, pòs minis afè etranjè a, aprè enstalasyon Ariel Henry nan tèt primati a.

Kèk mwa sèlman aprè M. Joseph te retounen nan chansèlri a, li te entame demach pou l eseye fè ekstrade kèk moun yo te sispèk kòm patisipan nan asasinay Prezidan Moise la, tankou ekstradisyon Mario Antonio Palacios Palacios, yon kolonbyen ki se prensipal sispè nan asasina a. Otorite peyi Jamayik te arete misye apre li te antre nan peyi a san bon papye vwayaj. Minis Afè Etranjè Joseph te mande tou ekstradisyon Samir Handal ke otorite nan Latiki te arete nan ayewopò entènasyonal Istanboul la nan moman li t ap fè yon eskal ant Etazini ak Lajòdani.

Avèk absans Claude Joseph nan kabinè ministeryèl la, kesyon ap poze pou mande eske pwosesis ekstradisyon sa yo pral kontinye ?

Anplwaye ministè afè etranjè yo salye depa Claude Joseph avèk anpil chalè, ak anpil siyn apresyasyon. Se sou aplodisman yo ke M. Joseph kite ministè a.

XS
SM
MD
LG