Accessibility links

Breaking News

OEA Leve Sispansyon li te Mete sou Honduras la


Oganizasyon Eta Ameriken yo (OEA) vote an favè retou Honduras nan òganizasyon an apre 2 zan sispansyon poutèt kou deta ki te fèt kont Prezidan Manuel Zelaya an jwen 2009.

OEA ki gen baz li nan Washington, DC leve sispansyon an avèk 32 vwa pou e youn kont. Ekwatè se sèl peyi ki kont desizyon an.

Vòt sa a dewoule apre yon akò ki te siyen nan finisman mwa me a ak prezidan aktyèl la Porfirio Lobo--- akò ki pèmèt mesye Zelaya retounen nan Honduras san pwoblèm.

Lèzetazini ak plizyè lòt peyi te retabli relasyon diplomatik ak Honduras apre eleksyon prezidansyèl 2009 yo.

Sepandan Ajantinn, Brezil, Ekwatè, Nikaragwa ak Venezuela te kont pou Honduras retounen nan òganizasyon rejyonal la akondisyon Mesye Zelaya jwenn otorizasyon pou l retounen nan peyi l san l pa gen menas pou li ale nan prizon.

Mesye Zelaya t ap viv lè sa a ann egzil nan Repiblik Dominikèn. Sekretè Deta Ameriken an Hillary Clinton konsidere retou Honduras nan OEA a kòm yon pa enpòtan nan wout ke peyi a genyen pou l fè e li di sa kapab ede lòt peyi nan Amerik Latinn nan k ap fè fas ak menm defi yo.

Sepandan, chèf diplomasi amerikèn nan presize, genyen plis travay ki pou fèt ankò nan Honduras pou amelyore jesyon li , ranfòsman sistèm demokratik li ak respè dwa moun.

XS
SM
MD
LG