Accessibility links

Breaking News

Obama: Konpayi BP Pral Peye Pou Petwòl Kap Tonbe Nan Gòlf Meksik La


Prezidan Lèzetazini an, Barack Obama, pale yè madi a ak pèp ameriken an pou l di konpayi petwòl BP (ou British Petroleum) pral oblije peye pou tout dega ki fèt nan eta ameriken ki bay sou Gòlf Meksik la akòz eksplozyon yon pui petwòl kri konpayi an genyen nan gòlf la –eksplozyon ki gen move konsekans sou lavi a nan eta sa yo. Se premye mesaj televize prezidan an prezante nan Biwo Oval Mezon Blanch la depi li te monte sou pouvwa a. 8 semèn aprè eksplozyon an ki te lakoz lanmò 11 moun e ki lage plizyè milyon galon petwòl nan gòlf la, Prezidan Obama di gouvènman ameriken an pral fè British Petrolem pran responsablite l.

Prezidan Obama kontinye pou l di li pral rankontre jodi mèkredi a avèk responsab konpayi BP yo e lap egzije pou yo tabli yon fon kredi pou benefis moun ki viktim fuit petwòl sa a ; e misye Obama ensiste pou l di se yon antite endepandan ki pral jere fon sa a.

«Mwen pral rankontre ak PDG konpayi BP a e map fè l konnen li fèt pou l mete sou kote tout kantite resous kap nesesè pou l dedomaje travayè ak pwopriyetè biznis ki sibi move konsekans sitiyasyon sa a, kòm rezilta neglijans konpayi an.»

Nan menm okazyon an, prezidan Obama anonse li chwazi yon pèsonalite pou dirije ajans gouvènmantal ki la pou sipèvize travay kap fèt pou devlope endistri gaz ak petwòl la o Zetazini – yon ajans ki tonbe anba akizasyon kòmkwa li ta nan twòp konnivans pafwa ak konpayi kap opere nan endistri sa a. Moun prezidan an chwazi a se yon ansyen komisè gouvènman ki rele Michael Bromwich.

Prezidan Obama di: «Responsablite moun sa a pandan 2 ou 3 mwa kap vini la yo, se pou l mete sou pye yon òganizasyon ki pral travay non pa kòm yon asosye, yon patnè endistri petwòl la, men pito kòm yon òganizasyon kap mete kontwòl sou endistri a.»

Moun ki tap dirije ajans sa a anvan trajedi ki pete nan Gòlf Meksik la te bay demisyon n mwa pase a. An plis chwa yon nouvo dirijan pou ajans la, gouvènman Obama gen plan pou divize l an 3 biwo separe pou l kapab bay pi bon randman nan siveyans travay konpayi petwòl yo.

Klike sou ikòn MP3 ki anwo e adwat atik sa a pou koute deklarasyon Prezidan Obama a.

XS
SM
MD
LG