Accessibility links

Breaking News

Barack Obama, Premye Prezidan Ameriken an Pòs ki Vizite Hiroshima


Prezidan Barack Obama pandan li tap depoze yon jèb flè nan Pak di Souvni pou Lapè Hiroshima a nan pati lwès Japon, vandredi 27 me 2016 la.

Prezidan Barack Obama tounen premye lidè ameriken ki vizite vil Hiroshima, o Japon, pandan li sou pouvwa a toujou. Hiroshima se vil kote yon avyon de gè Lèzetazini te lage premye bonm atomik la pandan 2èm Gè Mondyal la -pi presizeman nan dat 8 out 1945- e sete kòmansman fen lagè a. Pandan Misye Obama te genyen premye minis japonè a, Shinzo Abé, bò kote l, li fè deklarasyon sa a:

“Pwogrè teknolojik san pwogrè nan enstitisyon imen yo kapab lage nou nan tyouboum. Revolisyon syantifik ki te pèmèt lòm fann yon atòm an plizyè pati, reklame yon revolisyon moral an menm tan; e se pou sa nou prezan isit la Jodi a.”

Prezidan Obama (agoch) ap anbrase yon sitwayen japonè ki te siviv bonm atomik la. Non li se Shigeaki Mori e li te rankontre ak lidè ameriken an pandan li tap vizite Pak di Souvni pou Lapè Hiroshima a.
Prezidan Obama (agoch) ap anbrase yon sitwayen japonè ki te siviv bonm atomik la. Non li se Shigeaki Mori e li te rankontre ak lidè ameriken an pandan li tap vizite Pak di Souvni pou Lapè Hiroshima a.

Anvan Prezidan Obama te rive nan Hiroshima, li te rankontre ak twoup militè ameriken ki estasyone nan baz ayeryèn Iwakuni, pa lwen ak Hiroshima. Li fè sòlda yo konnen objektif vizit li a se onore memwa tout sila yo ki te pèdi lavi yo pandan 2èm Gè Mondyal la.

Lidè ameriken an deklare li pap prezante ekskiz pou desizyon Prezidan Harry Truman te pran pou l te fè lage bonm nan sou Hiroshima kote 80 mil moun te mouri imedyatman, sa ki te reprezante 90% popilasyon vil la. Nan dat 15 out 1945 Japon te anonse li tap sispann batay yo san poze okenn kondisyon; sete fen lagè a tou.

XS
SM
MD
LG