Accessibility links

Yon “Mesaj Lapè” Prezidan Barack Obama pou Pèp Peyi Kiba a.

  • Ekip Sèvis Kreyòl VOA

Prezidan Barack Obama pandan li tap fè yon diskou nan oditoryòm sal espektak El Gran Teatro nan La Avàn, Kiba, nan jounen madi 22 mas 2016 la.

Prezidan ameriken an, Barack Obama, pran lapawòl madi 22 mas 2016 la nan La Avàn, Kiba, kote li rive sou 3èm jounen yon vizit 3 jou ki fè l tounen premye lidè Lèzetazini ki ale nan peyi karayib la nan preske 90 zan. Misye Obama pale de istwa difisil relasyon ant Washington ak La Avàn; men li mete sa li rele “yon mesaj lapè” devan pèp kiben an pandan li rive nan fen vizit istorik sa a.

Misye Obama te fè yon pòz pou l pale de atak ki fèt byen bonè madi a nan peyi Beljik kote 3 eksplozyon frape kapital la, Briksèl, preske an menm tan: 2 nan ayewopò entènasyonal la ak yon 3èm nan yon biwo lapòs. Misye Obama di:

“Panse nou ak priyè nou rete avèk pèp peyi Bèljik la. Nou kanpe an solidarite avèk yo pou n kondane atak sovaj sa a kont moun inonsan. Nou pral fè tout sa nou kapab pou n apiye zanmi nou yo ak alye nou yo nan Bèljik e pou n trennen responsab yo devan lajistis.”

Prezidan Obama kontinye pou l di diferans ki egziste ant gouvènman ameriken an ak gouvènman kiben an, se diferans ki reyèl e yo anpil. Men, daprè li, tou lè 2 pati yo kapab travay ansanm pou yo ale an avan sou wout nòmalizasyon relasyon yo. Lidè ameriken an di 2 mo tou sou yon gwo pwen nan relasyon Kiba ak Lèzetazini: Kesyon anbago a. Prezidan Obama di:

<< Anbago a plis deranje pèp kiben an pase li ede li. Mwen te toujou kwè nan yon nosyon Reveran Martin Luther King, Jr. te dekri lè li te pale de ijans fawouch moman ki rele “kounyela a”. Nou pa ta dwe pè chanjman; okontrè, se ak 2 bra nou dwe anbrase chanjman. >>

Prezidan Barack Obama ki tap rankontre ak yon gwoup disidan kiben ak lòt sitwayen peyi a nan anbasad amerikèn nan nan La Avàn, Kiba, nan dat 22 mas 2016 la.
Prezidan Barack Obama ki tap rankontre ak yon gwoup disidan kiben ak lòt sitwayen peyi a nan anbasad amerikèn nan nan La Avàn, Kiba, nan dat 22 mas 2016 la.

Sou pwogram vizit Prezidan ameriken an, toujou nan jounen madi 22 mas la, li rankontre ak yon delegasyon disidan kiben. Pi ta, nan aprè-midi, li pral asiste yon match baseball ant yon ekip Lèzetazini ak seleksyon nasyonal Kiba a anvan li retounen Washington. Misye Obama se premye lidè ameriken ki ale Kiba depi ane 1928 lè Prezidan Calvin Coolidge te vizite La Avàn.

XS
SM
MD
LG