Accessibility links

Breaking News

Naomi Osaka Gen Siksè nan Tounwa Tenis Silicon Valley Klasik la


Foto Achiv: Japonez-Ayisyen Naomi Osaka pandan match dezyem tou li nan tounwa tenis WTA Masters 1000 nan vil Madrid, Espay, 1 Me, 2022.

Chanpyon tenis Ayisyano-Japonèz Naomi Osaka reprann madi aktivite spòtif li yo pou lapremye fwa depi mwad me pase a, ak yon match kote li ranpòte laviktwa sou Zheng Qinwen nan tounwa tenis Silicon Valley Klasik la.

Osaka, ki jwe pou Japon, te blese nan talon goch li anvan tounwa Open Franse a, kote li te pèdi nan premye tou a anvan li te rale kò li soti nan tounwa Wimbledon nan.

Ansyen nimewo un tenis mondyal la gen papa li kòm antrenè apre li te deside separe ak Wim Fissette. Li te montre li anfòm nèt fizikman nan match li te jwe nan evennman tenis WTA 500 an nan San Jose, Kalifòni. Osaka te deklare sou teren tenis la:

"Meyè zanmi mwen yo se isit yo soti. Donk, mwen byen familye ak kanpus la e mwen konn al asiste kou yo tou. Mwen santi m tankou yon moun ki rete nan vil sa a." Manmzèl klase kounyela a jwez no. 41 sou lis pi bon pami pi bon nan spò tenis la. Li ajoute: "Mwen kontan jwe, paske mwen pat jwe depi mwad Me. Mwen pat menm reyalize sa, se yon moun ki di'm sa."

Pwochen match Osaka, ki te ranpote tounwa Open Tenis Ameriken an an 2018 ak 2020, se pral avèk Coco Gauff, ki gen 18 an. Jèn dam sa a avanse nan dezyèm tou a apre li fin kale Ikrenyèn Anhelina Kalinina: 6-1, 6-0. Apwopo match sa a, Osaka, ki gen 24 an, deklare:

"Sa ki toujou enpresyone m ak Coco, se mantalite li... Lè mwen te gen laj li, mwen te konn fache souvan e mwen te montre sa. Mwen kwè se yon bagay ki vrèman cool ke li ka rete trankil tout tan."

Gauff klase no. 11èm mondyal sou lis pi bon pami pi bon yo, e li te ranpòte premye tounwa Gran Chelèm li nan Paris ane sa a.

XS
SM
MD
LG