Accessibility links

Breaking News

MINUSTAH Lanse yon Kanpay Kont Vyolans nan Kan yo ann Ayiti


Karen Eifert, Pòtpawòl Militè Minustah ann Ayiti.

Misyon Nasyonzini pou estabilizasyon ann Ayiti a, MINUSTAH, lanse yon kanpay anti vyolans pou konbat vyòl k ap fèt sou medam k ap viv nan kan pou sanzabri yo nan peyi a.

Polisye ak sòlda ki fè-pati fòs mentyen lapè Nasyonzini an ann Ayiti, resevwa antrenman pou konbat vyòl ak lòt kalte vyolans seksyèl k ap fèt nan kan yo ann Ayiti. E yo resevwa antrenman tou pou asire ke mounn ki viktim vyolans sa yo resevwa swen medikal. Se deklarasyon sa a chèf MINUSTAH a, Edmund Mulet, fè devan Konsèy sekirite LONU an lendi 13 septanm 2010 la.

Pandanstan, pòtpawòl militè MINUSTAH a, Karen Eifert, di lavwadlamerik depi mwad jiyè 2010 la, yo resevwa lòd pou yo ogmante sekirite nan kan de fortune yo.

Karen Eifert, Pòtpawòl Militè Minustah ann Ayiti.
Karen Eifert, Pòtpawòl Militè Minustah ann Ayiti.

Karen Eifert di: "Kounye a, militè MINUSTAH yo ap ede polis nasyonal Ayiti a ak polis Nasyozini an mete plis sekirite nan kan pou moun ki deplase yo. Nou pran desizyon sa a, paske Ayisyen yo te santi yo pa an sekirite. Nou te konn abitye fè patrouy andeyò kan yo ; kounye a, nou ni deyò, ni andedan kan yo sou demand pèp ayisyen an."

Pòtpawòl la kontinye pou l di yo kòmanse wè rezilta kanpay anti vyolans la, paske yo pa wè ankò yon seri de zak ki te kont fèt nan kan yo.

Lyetnan Karen Eifert kontinye pou l di: "Daprè sa n konprann, depi nou kòmanse ede Polis Nasyonal Ayiti a ak Polis Nasyonzini mete sekirite nan kan yo, nou pa wè yon ogmantasyon nan okenn kalte vyolans nan kan yo. O kontrè, sa nou konstante, se yon ogmantasyon nan kantite moun k ap vinn pote enfòmasyon ba nou. E nou konsidere sa kòm yon bagay trè pozitif, paske nou fè anpil efò pou etabli yon rapò ak moun ki abite nan kan yo. Yo vinn pote enfòmasyon ba nou, pakse yo konnen nap pran aksyon ki nesesè a. »

Madam Eifert fini pa di Minustah pran angajman pou l ede mete sekirite pou pèp ayisyen an, e li di le fèt ke Minustah ogmante prezans troup li yo nan kan yo, sa demontre angajman yo.

Pòtpawòl militè Nasyonzini, Karen Eifert, bay plis detay sou kanpay sa a nan yon entèvyou li bay Ronald César.

Klike sou ikòn MP3 ki anwo e adwat atik sa a pou w koute entèvyou Ronald César ak Lyetnan Karen Eifert

XS
SM
MD
LG