Jounal Miami Herald pibliye yon atik, dimanch 14 fevriye a, avèk tit sa a:
<< Plizyè Milye Moun Pran Lari ann Ayiti avèk Pawòl sa yo: “NOU PA VLE DIKTATI”>>, pandan yon mach pasifik ki ta pral tounen yon manifestasyon vyolan. Otè atik la, Jacqueline Charles, ekri :
<< Yon mach pasifik -ki t ap fèt pou pwoteste kont retou diktati ann Ayiti e pou egzije depa Prezidan Jovenel Moise- fini nan vyolans nan jounen dimanch la avèk lanmò yon moun pou pi piti, anpil jounalis ki blese epi lapolis ki tire kout gaz lakrimojèn ak bal an kouwoutyou sou foul la nan kapital peyi a…
Sou yon ti mòn ki tou prè Potoprens moun te ka wè yon lafimen nwa ki t ap sòti nan machin ak kawoutyou ki t ap boule kòm barikad pou bare lari yo; se dènye konfwontasyon an dat ki dewoule nan kad kriz politik ki pete ann Ayiti a sou kesyon pou konnen ki lè manda Prezidan Jovenel Moise pran fen. Manifestan yo akize lidè ayisyen an dèske li kenbe pouvwa a ilegalman paske manda li, dapre konstitisyon an, fini depi le 7 fevriye. Prezidan Moise pa dako; li di manda l p ap pran fen pazavan 7 fevriye 2022, e Lèzetazini, Nasyon Zini ak l OEA pataje opinyon lidè ayisyen an… >>
Pi lwen nan atik la, Jacqueline Charles ekri:
<< Pandan mwa septanm, oktòb, novanm pase yo (“pandan sezon otòn nan”), alòske Ayiti t ap antre pi fon nan yon seri lese-frape vyolan ki t ap fèt nan lari nan pwotestasyon anti-govènmantal yo, Joe Biden, ki t ap mennen kanpay lè sa a e ki te fèk sòt vizite Little Haiti/Ti Ayiti nan Miami, te pibliye yon tweet kote l te atake Donald Trump kareman. Nan tweet sa a, M. Biden te ekri:
“Administrasyon Trump la abandone pèp ayisyen an alòske yon kriz politik ap paralize peyi a. Kòm Prezidan, mwen pral mete presyon pou genyen yon dyalòg dekwa pou evite plis vyolans ak plis enstabilite.” >>