Accessibility links

Breaking News

Etazini: Mezantant Otou Anivèsè Atak Teworis 11 Septanm 2001 an


Ozetazini, pastè yon legliz evangelik di li gen fèm volonte pou l egzekite pwojè li genyen pou l boule plizyè kopi Koran an ---ki se liv sakre mizilman an--- samdi 11 septanm k ap vini la a pou make 9èm anivèsè atak teworis ki te fèt sou Nouyòk, Washington ak Pennsilvani 11 septanm 2001 an, malgre kritik ki soti bò kote gouvènman Obama a, Nasyonzini ak bò kote divès lidè relijye.

Non pastè sa a se Terry Jones. Reveran Jones di mèkredi 8 septanm nan sou rezo televizyon CBS legliz li a gen konviksyon mesaj l ap voye a se yon mesaj trèz enpòtan; e aksyon l pral poze a se yon pwotestasyon k ap voye yon mesaj bay Islam radikal la.

Reyaskyon sou plan Pastè Jones nan.

Sekretè deta ameriken an Hillary Clinton fè konnen –nap site: "Se yon plan derespektan e ki lage wont sou moun k ap poze aksyon sa a.” Chèf diplomasi amerikèn nan fè deklarasyon sa a madi 7 septanm nan nan yon dine ki dewoule nan Depatman Deta a pou obsève fèt mizilman ki rele Iftar la, sètadi yon sispansyon nan jèn manm relijyon Islam nan fè chak jou pandan mwa sen mizilman an, an palan de Ramadan.

Pi gwo kòmandann militè Lèzatazini an nan Afganistan an, Jeneral David Petraeus, ak sekretè jeneral fòs l’OTAN yo, Anders Fogh Rasmussen, lanse avètisman pou yo di, si 50 manm legliz sa a reyalize plan yo genyen an, sa kapab mete sòlda peyi oksidantal ki nan Afganistan yo an danje.

Pastè Terry Jones di li pran avètisman sa yo o serye; sepandan li menm ak manm legliz la déjà pran desizyon pou yo boule Koran an e yo dispoze reyalize plan an.

XS
SM
MD
LG