Accessibility links

Breaking News

Lendi 30 Me 2016 la se Memorial Day Ozetazini. Onè pou Sòlda ki Tonbe sou Chandbatay yo


Prezidan Barack Obama nan Simityè Nasyonal Arlington nan nan okazyon Jou di Souvni an (Memorial Day).

Ozetazini, Prezidan Barack Obama te nan tèt kèk seremoni ki dewoule pou Ameriken yo make Memorial Day, oubyen Jou di Souvni, kote yo onore gason ak fanm ki te mouri pandan yo tap sèvi nan fòs zame peyi a. Tou dabò, nan kòmansman jounen an Misye Obama te prezide yon seremoni kote li te resevwa kèk gwoup militè aktif ak veteran pou yon dejene nan La Mezon Blanch.

Prezidan Obama te kite La Mezon Blanch pou l te patisipe nan yon seremoni souvni nan Simityè Nasyonal Arlington nan, nan pati nò Eta Vijini tou prè Washington, kote li depoze yon jèb flè sou tonbo Sòlda Enkoni an anvan li te prezante mesaj prezidansyèl tradisyonèl la. Prezidan Obama di :

“Ameriken ki antere isit la ak manm fanmi yo, se pi bon pami pi bon peyi a genyen. Nou te egzije tout bagay nan men yo. E jodi a, sèl sa yo mande nou an retou, se pou n pa bliye yo… Fason pou nou sonje yo vrèman, fòk nou bay yon sòlda ki te sakrifye tèt li pou l mennen kadav kanmarad li retounen nan peyi a, garanti ke yon veteran ap jwenn tout sa li merite: bon jan swen sante ak bon travay. Nou dwe fè plis efò toujou, paske travay nou pap janm fini. Nou dwe la... non sèlman lè nou bezwen yo, men tou lè yo bezwen nou.”

Karavàn motosiklèt nan okazyon Memorial Day nan Washington D.C.
Karavàn motosiklèt nan okazyon Memorial Day nan Washington D.C.

Nan okazyon Jounen di Souvni an, yon gwoup veteran te respekte la tradisyon dimanch 29 me 2016 la, kote yo te mete sou pye yon karavàn motosiklèt ki te vin abouti Washington pou yo onore e apiye sòlda ameriken yo. Sepandan aktivite sa a te tounen yon kanpay politik an favè kandida a la prezidans ki jwenn nominasyon pati repibliken an, an palan de Donald Trump. Misye Trump te pale nan okazyon an e li fè deklarasyon sa a – antwòt.

Premyèman, nou fèt pou nou rebati lame nou an; se pa bann e pa pakèt efektif li ap diminye. Lè nou sonje Gran Jeneral Patton ak tout lot gran jeneral yo, se souke kadav yo ap souke nan tonbo yo jodi a lè yap gade sa kap pase. Nou pa kapab bat gwoup Eta Islamik la. Ebyen, se yon rakle nou pral ba yo… Jwèt sa a pral fini... Nou pral mete fen nan bagay sa a.”

Oganizatè karavàn motosiklèt la fè konnen evennman sa a rive rasanble ane sa a plis pase yon milyon moun lè w mete ansanm motosiklis yo ak moun ki vin gade espektak la. Yo fòme tou yon òganizasyon ki pa la pou fè benefis e ki ranmase lajan pou veretan lame amerikèn nan ak manm fanmi yo.

XS
SM
MD
LG