Accessibility links

Madi 17 Out la, KEP a ap Pibliye Lis Definitif Kandida a la Prezidans yo

  • VOA Nouvèl

Nan yon jou (madi 17 out 2010 la) Konsèy Elektoral Pwovizwa a (KEP) pral pibliye lis kandida ki kalifye pou yo patisipe nan eleksyon prezidansyèl ki fikse pou 28 novanm pwochen.

Pandan jou ki pase yo, KEP a te resevwa doleyans ak plent senp sitwayen ou byen gwoup ki gen bagay pou yo di sou tèl ou tèl kandidati, si yo panse kandida konsène pa respekte kondisyon lwa elektoral la ou byen konstitisyon an poze pou yo patisipe nan eleksyon yo.

Daprè chif KEP a pibliye, geneyn jiska 34 lidè pati ou sitwayen ki poze kandidati yo pou pòs prezidan an.

Yon lòt kote, yon ofisyèl ki pale nan non pati ki sou pouvwa a (INITE) pale pou l mete fen nan rimè k ap di kòmkwa t agenyen divizyon nan mitan pati a. Vrèman vre nouvèl yo fè konnen sanble kèk manm INITE ta kite pati a pou yo apiye kandidati ansyen Premye Minis Jacques Edouard Alexis ki pat gen chans wè lidè INITE yo chwazi l pou reprezante l nan eleksyon yo.

Ansyen depite Sorel Jacett ki pale nan non INITE, fè konnen pa genyen manm ki kite pati a; "tout moun te la nan yon reyinyon ki te dewoule nan week end nan", daprè sa li di Lavwadlamerik.

Dimanch 15 out la, sete Fèt Notre Dame, ki se Sen Patron Pòtoprens, Kap Ayisyen, Ti Gwav, O Kay, Gran Gozye pou n site vil ak lokalite sa yo sèlman.

Tradisyonèlman a kote bal ak lòt selebrasyon, genyen seremoni relijyez ki dewoule pou make okazyon an. Ane sa a, kèk kandida ak pèsonalite enpòtan te fè deplasman an nan pawas nou site yo pou yo asiste la mès. O Kay ,pa egzanp, popilasyon an te resevwa vizit kandida a la prezidans Wyclef Jean ak madam Veronique Mittérand Duvalier, madanm ansyen prezidan ayisyen Jean Claude Duvalier.

Korespondan nou yo atravè Ayiti devlope nouvèl sa yo pou nou.

Klike sou ikòn MP3 ki anwo e adwat atik sa a pou w koute repòtaj VOA kreyòl pou jounen 16 out 2010 la

XS
SM
MD
LG