Accessibility links

Libi: Konsèy Nasyonal Tranzisyon an Ap Transfere Sant “Gouvènman” li a nan Tripoli

  • VOA Nouvèl

Libi: Konsèy Nasyonal Tranzisyon an Ap Transfere Sant “Gouvènman” li a nan Tripoli

Konsèy Nasyonal Tranzisyon an nan peyi Libi ke rebèl yo te mete sou pye pou ranvèse rejim kolonèl Mohammar Kadhafi a, fè konnen l ap deplase syèj gouvènman li fòme a --ki t ap fonksyone nan vil Benghazi-- pou l al plase li nan kapital la, Tripoli. Ali Tarhouni, ki se responsab kesyon finans nan konsèy la, pale jedi 25 out 2011 la pou l di komite santral konsèy la pral travay kounyela a nan Tripoli.

Misye Tarhouni di:

“Daprè lòd mwen resevwa nan men Konsèy Nasyonal Tranzisyon an, ki gen nan tèt li Misye Mustafa Abdel Jalil, e daprè lòd komite santral la ki anba direksyon Doktè Mahmoud Jiblil, mwen pwoklame kòmansman travay komite santral la nan yon Tripoli lib ; e sa ap fèt apati de moman m ap pale la a.”

Misye Tarhouni fè anons sa a alòske lidè libyen an, Mohammar Kadhafi, lanse apèl bay patizan n yo pou l mande yo leve kanpe e mache pran rebèl k ap eseye dechouke l sou pouvwa a. Vrèman vre, nan yon mesaj tou kout ki pase sou lèzond jedi 25 out la, Misye Kadhafi di li konsidere rebèl yo kòm move rat e li denonse peyi etranje ki, daprè sa li di, vin mele nan konfli libyen an.

Nan mesaj laprès prezante kòm yon anons Mohammar Kadhafi voye bay pèp libyen an --sitou moun kap viv nan kapital Libi a, Tripoli-- li di :

"Pèp libyen, Libi se peyi nou. Tripoli se pwopriyete moun ki abite nan Tripoli. Se pa pwopriyete trèt yo ki bese ba devan l OTAN. Se yon bann trèt yo ye. Yo pa moun Tripoli ; yo se yon bann etranje, yon bann trèt. Tripoli se pwopriyete pa nou."

Pandansetan, gwo batay kontinye nan 2 zòn pou pi piti nan Tripoli, ant fòs k ap defann Kadhafi ak konbatan rebèl yo. Pa egzanp, nan yon katye ki rele Abu Salim (ki se yon gwo baz pou patizan ansyen rejim nan), rebèl yo ap fè desant-de-lye san rete, y ap fouye, y ap chache moun ki rete fidèl ak rejim Kadhafi a.

XS
SM
MD
LG