Accessibility links

Breaking News

Ayiti-Vyolans: Leve-Kanpe Popilè 7-8 Jiyè 2018 la nan Je Laprès Ayisyèn


Touris kiben ki te mete yo nan liyn pou yo te pran avyon nan Ayewopò Tousen Louvèti a nan Pòtoprens nan jounen madi 10 jiyè 2018 la. Mouvmanleve-kanpe a te bare yo ann Ayiti. (Foto: S. Lemaire/VOA).

Evennman ki te make lavi a nan peyi d Ayiti pandan wikenn pase a, swa ant 6 ak 8 jiyè 2018, kontinye ofri laprès (jounal ekri, pale ak televize) sous kòmantè ak opinyon ki alimante kolonn yo ak repòtaj yo. Nou pral wè kèk egzanp.

Jounal Le National pibliye yon atik kote li atire atansyon sou le fèt ke kominote entènasyonal la enterese nan solisyon kriz la, si byen ke li “ankouraje yon dyalòg” nan rechèch solisyon sa a. Jounal la ekri:

“Farkan Haq, pòt-pawòl adjwen Antonio Guterres, Sekretè Jeneral Oganizasyon Nasyon Zini (l’ONU), te pale nan jounen lendi 9 jiyè a pou l fè konnen òganizasyon mondyal la lanse yon apèl bay aktè politik yo ann Ayiti pou l mande yo prese antre nan yon dyalòg. Misyon Nasyonzini pou Kore Lajistis ann Ayti (MINUJUSTH) ankouraje tout aktè yo pou yo antre nan yon dyalòg konstriktif dekwa pou yo kapab jwenn yon solisyon pasifik pou sitiyasyon an.”

Yon sèn kote zak vyolans te dewoule pandan mouvman leve-kanpe a nan Pòtoprens (Samdi 7 jiyè 2018)
Yon sèn kote zak vyolans te dewoule pandan mouvman leve-kanpe a nan Pòtoprens (Samdi 7 jiyè 2018)

Radyo Ibo, bò kote pa l, fè kèk kòmantè manch long sou sitiyasyon kriz evennman wikenn yo kreye nan peyi a. Nan yon repòtaj radyo a difize nan premye pwogram nouvèl li pou mèkredi 11 jiyè a, li di:

<< Pouvwa egzekitif la se sèl responsab zak piyaj ak zak mete dife ki afekte plizyè biznis pandan wikenn nan, daprè Collectif Défenseur Plus. Direktè oganizasyon sa a, Antonal Mortimé, fè konnen: “Sitiyasyon sa a se rezilta kèk desizyon endifòm e enjis pouvwa egzekitif la pran e ki pa ale nan sans revandikasyon ni doleyans popilasyon an.” >>

Nan jounal maten Radyo Metwopòl la, li di:

<< Leve-kanpe popilè a te fèt yon fason sanzatann e rapid; e li tradui yon sèten enpasyans melanje ak mekontantman bò kote popilasyon an, daprè Depite Petyonvil la, Jerry Tardieu. M. Tardieu mande pati politik yo pa chache tire avantaj nan mouvman wikenn pase a. Fowòm Ekonomik sektè prive a, li-menm, denonse sa li rele “mank leadership” Prezidan Jovenel Moise. Patwon yo ap voye pye e yo di Premye Minis Jack Guy Lafontant fèt pou l kite pouvwa a egzijibleman. >>

Yon sèn kote zak vyolans te dewoule pandan mouvman leve-kanpe a nan Pòtoprens (Samdi 7 jiyè 2018).
Yon sèn kote zak vyolans te dewoule pandan mouvman leve-kanpe a nan Pòtoprens (Samdi 7 jiyè 2018).

Anfen Radyo R-FM, ki ekri tou sou ensidan malouk wikenn yo, kòmanse pa rapòte deklarasyon Konsèy Siperyè Pouvwa Jidisyè a ki fè konnen:

“Rezon-dèt evennman regretab ki fèk pase nan peyi a se rezilta divès kalite mankman.” KSPJ lanse apèl bay tout pouvwa piblik yo pou l mande yo pran responsablite yo yon fason pou yo korije sitiyasyon an… R-FM ajoute:

“Nan jounen madi a se pa bann e pa pakèt moun t ale nan makèt ke popilas la pa t piye ni boule pandan 3 jou deblozay ki te dewoule nan zòn metwopolitèn Pòtoprens la. Alòs divès sektè nan popilasyon an te an mezi pou yo ravitaye yo,” sa vle di pou yo achte pwovisyon mete lakay yo.

Sepandan kèk sous nou kontakte nan zòn metwopolitèn Pòtoprens la (sant vil la, Boudon, Kanapevè, Dèlma, Petyonvil, Kafou, Taba, Laprenn, elt...) fè nou konnen pami magazen/makèt/boutik popilas la pa t boule pandan mouvman leve-kanpe a, pa t gen anpil ki te ouvè. Pa egzanp, yon kòlèg nou ak yon vwazen li ki abite Kris Wa te oblije ale jous Kafou Klèsin pou yo te fè pwovizyon; dayè yo pa t rive jwenn tout sa yo te bezwen pou yo ravitaye. Men jounalis sa a fini pa di nou li gen enpresyon lavi a ap retounen nan nòmal li piti piti nan kapital la.

XS
SM
MD
LG