Accessibility links

Breaking News

Lamezonblanch, Depatman Deta Konfime Liberasyon 3 Lòt Misyonè Ameriken ann Ayiti


Manadjè Christian Aid Ministries (a goch) ki t a pale ak yon anplwaye devan baryè lokal misyon an nan Titanyen, Pòtoprens, dimanch 21 Nov. 2021.

Lamezon Blanch ak Depatman Deta reponn kesyon VOA Kreyol te poze nan jounen lendi 29 desanm nan, savwa ki reyaksyon yo aprè yo te resevwa nouvèl ki pale de liberasyon 3 lòt misyonè ann Ayiti.

Yo tou le 2, Lamezonblanch ak Depatman Deta, ba nou menm respons la. Yo fè konnen:
"Se ak kèkontan nou resevwa nouvèl ki fè konnen 3 lòt pami moun ke yo kenbe ann otaj ann Ayiti libere. Nou pa gen okenn lòt deklarasyon pou nou fè pou kounye a."

Sepandan, nan yon konferans pou laprès ki dewoule chak jou nan Depatman Deta a, pòtpawòl Ned Price bay VOA yon ti kras plis detay. Men sa li di nou:

"Nou konnen gwoup misyonè a pibliye yon deklarasyon, e nou ka konfime ke vrèman vre gen 3 nan otaj yo ki jwenn liberasyon yo. Se yon sityasyon nou konsidere kòm pi gwo priyorite nou - menm jan sa te ye lè yo te fèk kidnape yo a." .

Pòtpawòl la ajoute: "Gen plizyè sitwayen ameriken ke yo toujou kenbe ann otaj ann Ayiti. Nou kontinye travay sou sa nan nivo ki pi wo yo, ansanm ak gouvenman Ayisyen an epi ak patnè nou nan lòt ajans yo, plis patnè kanadyen nou yo pou n fè tout sa nou kapab pou n asire n ke yo lage rès otaj yo. "

Oganizasyon Relije Christian Aid Ministries anonse gang ki kidape misyonè li yo ann Ayiti te lage 3 lot moun yo samdi 4 desanm nan aswè. Nan yon mesaj misye an pibliye sou paj entènèt li a, li fè konnen:

“Menm jan ak liberasyon kite fet anvan sa yo, nou pa ka bay non moun yo lage yo, ni pale de sikonstans liberasyon an, ni bay okenn lot detay."

Gwoup la di, pandan 3 jou kap vini yo, li ta renmen konsantre li sou lapriyè ak jèn pou otaj yo. Oganizasyon relijyèz la deklare:

“Tanpri, kontinye lapriyè pou moun ki toujou nan men kidnapè yo ke yo poko lage. N ap tann jou kote tout otaj yo va rejwenn fanmi yo.”

Nap raple ke gang 400 Mawozo te kidnape 17 misyonè entranje (16 ameriken ak yon kanadyen) nan dat 16 Oktòb pase a. Yo te mande yon ranson $1 milyon dola pa tèt pou liberasyon moun sa yo. Pami otaj yo te gen timoun. Lidè gang la te menase pou l touye otaj yo si demann gwoup la pa t jwenn satisfaksyon.

Etazini voye plizyè responsab Depatman Lajistis ak ajan FBI nan Pòtoprens pou travay ak Polis Nasyonal Ayiti a (PNH) sou liberasyon misyonè yo.

21 Novanm pase a Christian Aid Ministries te anonse liberasyon 2 misyonè. Li pa t bay anpil detay sou sikonstans liberasyon yo non plis, eksepte ke li te di li te kontan a mò poutèt 2 moun yo te lage, yo te an bòn eta e yo t ap resevwa swen.

Korespondan VOA nan Lamezonblanch Patsy Widakuswara ak Korespondan nan Depatman Deta Nike Ching kontribye nan repòtaj sa a.

XS
SM
MD
LG