Nan moman karavàn k ap transpòte migran santwo-ameriken yo ap kontinye yon vwayaj a-pye difisil nan direksyon Lèzetazini, Prezidan Donald Trump pran lapawòl ankò, jedi 25 oktòb 2018 la, pou l di li dispoze sèvi ak fòzame peyi li pou anpeche karavàn sa a travèse fwontyè sid peyi a pou li antre sou tèritwa ameriken an.
Nan yon tweet lidè ameriken an pibliye byen bonè nan jounen an, li fè konnen -nap site: <<Map voye fòszame nou al konfwonte ijans nasyonal sa a. Nou pral stope yo.>> Prezidan Trump tonbe dakò tou ak lidè yon sendika asosyasyon polis k ap siveye fwontyè a ki di "Se Demokrat yo ki responsab si imigran sa yo ap chache antre Ozetazini.>>
Misye Trump di anpil pawòl tou pou l denonse otorite yo nan Ondiras, Salvadò avèk Gwatemala poutèt yo pa rive bloke sitwayen yo pou yo pa t pran direksyon Lèzetazini. Lendi pase a lidè ameriken an te di li dispoze koupe tout asistans ekonomik Washington ap bay 3 peyi santwo-ameriken yo e li te menase pou l itilize lame amerikèn pou l fèmèn fwontyè a.