Nan peyi Lejip, lame apwouve transfè pouvwa a k ap sòti nan men Prezidan Hosni Mubarak pou l tonbe nan men vis-prezidan Omar Suleiman ; se konsa tou militè yo lanse apèl pou yo mande pou yon vi nòmal retounen nan kapital peyi a, Lekèr, aprè 18 jou manifestasyon kont misye Mubarak.
Lame a fè parèt yon deklarasyon nan sans sa a vandredi 11 fevriye 2011 la aprè li te fin fè yon rankont ak Konsèy Siprèm Nasyon an ; òganizatè mouvman leve-kanpe a te prevwa yo tap mete sou pye pi gwo manifestasyon an depi mouvman rebelyon popilè a te kòmanse mwa pase a.
Daprè sa k di nan deklarasyon wo-grade militè yo mete deyò a, lame pral chache gen garanti ke refòm Prezidan Mubarak pwopoze yo, reyalize jan gouvènman n nan planifye yo-a –pami refòm sa yo, genyen posiblite pou Leta leve yon eta-dijans ki la depi 30 tan e ki pèmèt gouvènman an kenbe yon kontwòl sere-sere, a pati de yon sistèm siveye-rapòte, sou sitwayen ejipsyen yo.
Deklarasyon an pwomèt tou pou eleksyon prezidansyèl ki fikse pou septanm 2011 la dewoule yon fason lib e demokratik. Anfen, lame bay manifestan yo konsèy pou yo rantre lakay yo.