Accessibility links

Breaking News

Lachin Deklare Rankont ant Prezidan Hu ak Prezidan Obama a yon Siksè


Lachin Deklare Rankont ant Prezidan Hu ak Prezidan Obama a yon Siksè

Ozetazini, yon jou apre prezidan chinwa a, Hu Jintao, te jwenn yon akèy donè nan La Mezon Blanch, li genyen pou l ale jedi 20 janvye 2011 la nan Kongrè ameriken an kote li pral fè fas ak kèk nan pèsonalite ki fè kritik ki pi di kont li Ozetazini.

2 pi gwo otorite nan kongrè a (lidè majorite a nan Sena a, Demokrat Harry Reid, avèk Prezidan Chanm dè Reprezantan an, repibliken John Boehner) yo tou lè 2 te rejte envitasyon La Mezon Blanch te voye ba yo pou yo te asiste yon dine ofisyèl Prezidan Barack Obama te òganize, mèkredi 19 janvye 2011 la nan aswè, nan lonè lidè chinwa a. Sete yon dine kote patisipan yo te pote wozèt-nwa, e nan asistans la te genyen kèk aktè, òm politik ak mizisyen de renome nasyonal.

Ni Senatè Reid, ni depite Boehner fè konnen y ap tann pou yo rankontre Prezidan Hu. Sepandan, nouvèl yo fè konnen anpil manm Kongrè a pa kontan ditou ak politik monètè Lachinn nan –paske plizyè nan yo panse se yon politik ki lakoz Lèzetazini pèdi anpil travay--- menm jan yo pa satisfè non plis ak dosye dwazimen Peken an. Nan yon entèvyou Senatè Reid te bay semèn pase a nan televizyon, li pat mete dlo nan bouch li pou l di li konsidere Prezidan Hu Jintao kom yon diktatè.

Nan yon konferans pou laprès lidè chinwa a bay ansanm ak Prezidan Barack Obama mèkredi 19 janvye 2011 la, li fè yon konsesyon li pa fè souvan sou dosye dwazimen an nan peyi li. Aprè misye Obama te lanse apèl piblikman pou l mande Lachin respekte « dwa inivèsèl yo », Misye Hu di li rekonèt genyen anpil travay ki rete pou fèt toujou pou amelyore dosye dwa-moun nan Lachin.

Nan okazyon vizit lidè chinwa a ap fè Ozetazini an, jounal yo nan Lachin pibliye foto ki montre Prezidan Obama ak Prezidan Hu nan dine ki dewoule nan La Mezon Blanch la. Jounal ofisyèl la, Chin Nouvèl, ekri an anglè pou l di vizit misye Hu nan Washington nan reprezante –nap site : « Yon tounan istorik nan relasyon diplomatik ant Lèzetazini ak Lachin, » Pot-pawòl Ministè afè etranjè a nan Peken, Hong Lei, pale nan menm sans sa a.

Misye Hong di: ”Prezidan Hu Jintao fè kék chita-tande chaje ak siksè avèk Prezidan Obama. 2 pati yo mete yo dakò pou yo travay pou yo bati yon patenarya amerikano-chinwa k ap pote benefis pou tou lè 2; yon patnarya ki baze sou respè yo chak genyen pou lot. E nou konsidere sa kom yon bon tandans pou epòk nap viv la a."

XS
SM
MD
LG