Accessibility links

Breaking News

Lachin/Sante: Kantite Enfeksyon Kowonaviris la Depase 72 Mil - Kantite Mò yo Preske 1900


Espesyalis lasante, avèk rad pwoteksyon sou yo, ki t ap swaye, nan Lopital Kwa Wouj vil Wouhann nan, nan Lachin, yon moun ki trape maladi kowonaviris la. (Foto: China Daily via REUTERS, 16 fevriye 2020).

Nan Lachin, kantite konfime moun ki enfekte ak maladi kowonaviris la fè yon ralanti nan jounen madi 18 fevriye 2020 an; sepandan kantite moun ki mouri akoz epidemi an monte rive preske mil 900 –pami yo genyen direktè lopital vil ki nan sant epidemi an. Non direktè a se Liu Zhiming; li t ap dirije Lopital Wuchang, nan vil Wuhann, kapital pwovens Hubei kote epidemi an te eklate an desanm 2019. Vrèmanvre, otorite yo rapòte mil 886 nouvo ka; depi mwa janvye pase a se premye fwa kantite nouvo ka yo anrejistre pa jou rete pi ba pase 2000; sepandan kantite total moun ki trape viris la depase 72 mil. Yo rapòte yon total 98 mò; swa premye fwa chif la pou yon jou desann pi ba pase 100 nan yon semèn.

Direktè jeneral Oganizasyon Mondyal Sante a (OMS), Tedros Adhanom Ghebreyesus, fè konnen chif ki fèk parèt sou kantite enfeksyon tou nèf yo sanble “montre yon bès nan nouvo ka yo”; sepandan, dapre li, moun fèt pou entèprete nouvo done yo avèk anpil prekosyon. Li deklare:

Direktè Jeneral Oganizasyon Mondyal Lasante, (OMS), Tedros Adhanom Ghebreyesus.
Direktè Jeneral Oganizasyon Mondyal Lasante, (OMS), Tedros Adhanom Ghebreyesus.


“Nou pa genyen ase done sou kantite ka yo anrejistre andeyò Lachin pou n tire yon konklizyon ki valab.”

Yon doktè poumon chinwa fè previzyon pou l di kantite moun ki enfekte yo pral estabilize olye yo bese lè chif la va fin atenn yon somè pi ta nan mwa fevriye a. Lidè OMS la ajoute plis pase 80% malad yo “santi yon ti malèz lejè e yo gen pou yo refè.”

Epidemi kowonaviris la kontinye simen lapèrèz nan le mond antye. OMS rapòte 804 ka andeyò tèritwa chinwa a nan 25 peyi –pami yo gen 3 moun ki mouri. Daprè nouvèl ki sòti Larisi, otorite yo di apati de jedi 20 fevriye 2020 an, yo pa p kite okenn chinwa antre nan peyi a. Vis premye-minis pou sante a, Tatiana Golikova, di desizyon sa a “te nesesè, paske epidemi an ap vin pi grav nan Lachin plis le fèt ke sitwayen chinwa yo kontinye debake sou tèritwa ris la.”

Sekretè Deta ameriken Mike Pompeo, ki te pran lapawòl nan yon resepsyon pou lidè biznis nan vil Luanda, Angola, lendi 17 fevriye 2020 an. Anvan sa M. Pompeo te vizite Senegal (se premye ofisyèl wo plase ameriken ki ale nan peyi sa a nan 18 mwa).
Sekretè Deta ameriken Mike Pompeo, ki te pran lapawòl nan yon resepsyon pou lidè biznis nan vil Luanda, Angola, lendi 17 fevriye 2020 an. Anvan sa M. Pompeo te vizite Senegal (se premye ofisyèl wo plase ameriken ki ale nan peyi sa a nan 18 mwa).

Pou sa ki konsène Lèzetazini, Sekretè Deta Mike Pompeo fè konnen Lèzetazini “te pran twòp tan pou l voye eskpè medikal” nan Lachin pou ede konbat epidemi an. Pandan chèf diplomasi amerikèn nan ap fè yon toune ann Afrik, li deklare:

<< Nou espere chak peyi ki genyen enfòmasyon, (pami yo nou lote Lachin), va aji yon fason ouvè e transparan. Nou espere gouvènman chinwa a va ogmante transprans lakay li e li va kontinye pataje enfòmasyon. >>

XS
SM
MD
LG