Accessibility links

Breaking News

Etazini-KOVID19: Espesyalis yo Avèti ant 100 Mil e 200 Mil Moun ka Mouri Anba Kowonaviris Ozetazini


Anplwaye medikal kap ede moun ki enfekte ak kowonaviris la. REUTERS/Juan Medina.

Prezidan ameriken an, Donald Trump, deklare nan jounen lendi 30 mas 2020 an lòd li pase pou popilasyon an kontinye obsève distans sosyal la pou jous fen mwa d avril la, kapab sove lavi yon milyon moun Ozetazini. Lidè ameriken di:

“Nou pral ranpòte yon gwo viktwa. Nou pa gen lòt chwa.”

Bò kote pa yo, pi gwo otorite ameriken nan domèn lasante a lanse avètisman pou yo di menmsi popilasyon an an jeneral ta respekte règleman yo kòmsadwa, kantite total moun k ap mouri anba maladi kowonaviris la nan peyi a pral sitiye ant 100 mil e 200 mil.

Pandan Prezidan an t ap pale ak jounalis yo nan yon pwendeprès li bay chak jou avèk ekip espesyal La Mezon Blanch fòme pou travay sou kowonaviris la, li di yo yon milyon moun atravè tout peyi a deja teste pou maladi a.

Nouvèl yo fè konnen kantite ka konfime KOVID-19 Ozetazini depase 160 mil jounen jodia; sa vle di Lezetazini se peyi ki genyen pi gwo kantite ka kowonaviris nan lemond; pami ka sa yo yon afè de 2 mil 800 moun mouri. Dapre chif laprès pibliye, nan jounen lendi 30mas la yo te anrejistre yon kantite rekò moun ki mouri yon sèl jou, swa 486.

Nan menm jounen lendi a Prezidan Trump te genyen yon apèl-konferans avèk tout gouvènè ameriken yo e, pou Misye Trump rezime konvèsasyon an, li fèò konnen gouvenen yo di li “mèsi poutèt ou fè yon bèl travay.”

Bò kote pa l, gouvènè Eta Montana a, Steve Bullock, ki se yon Demokrat, deklare otorite yo ap redi anpil pou yo detekte sitwayen Ameriken ki pran kontak ak moun ki deja enfekte, paske “nou pa fè kantite tès ki nesesè yo, nou pa genyen mwayen pou n fè tout tès ki nsesè yo.” Se Jounal New YorkTimes ki site Gouvènè Bullock daprè yon anrejistreman jounal la resevwa sou konvèsasyon Prezidan Trump te genyen avèk li-menm e kolèg li yo.

XS
SM
MD
LG