Accessibility links

Koup Dimond lan ap Kontinye Nan Afrik Di Sid

  • Coralie Saint-Louis

Yon fanatik Meksiken ki degize pou gwo fèt foutbòl la, vandredi 11 jen 2010

Nan Afrik di Sid, se gwo kontantman ak lajwa jodi toupatou atravè peyi a. Afrik di Sid se premye peyi sou kontinan afriken an k’ap òganize yon koup du Mond foutbòl. Edisyon 2010 la reyini 32 peyi sou planèt la. Kompetisyon yo ap dire yon mwa, e rankont ki inogire touwna a vandredi 11 jen an, te mete fas-a-fas peyi òganzitè a, Afrik di Sid ak Seleksyon Nasyonal Meksik la nan stad Soccer City nan vil Johannesburg. Match sa a fini sou yon skò nil 1 a 1.

Apeprè 90.000 fanatik abiye ak koulè ekip Afrik Di Sid la te gonfle nan stad la pou yo asiste premye match Mondial la kont Meksik. Pami fanatik ki te vinn gade match la, te genyen prezidan sid afriken an, Jacob Zuma, ak prezidan Meksik la, Felipe Calderón, chita kòtakòt ak foula ekip yo nan kou yo.

Sepandan, moman fyète ak lajwa sa pou tout Afrik di Sid la mache ak yon koulè sonm tou, akòz lanmò yon pitit-pitit ansyen prezidan peyi a / e ansyen loreya Pri Nobèl Lapè / Melson Mandela.Vrèmanvre, pitit-pitit fi lidè anti-Apartheid sid-afriken an, Nelson Mandela, mouri nan yon aksidan machinn apre l te finn patisipe nan konsè pou lanse Mondyal 2010 la.

Non pitit-fi a se Zenani Mandela. Fondasyon Nelson Mandela a di madmwazèl Mandela pèdi lavi l’ sou yon otowout Johannesburg nan yon aksidan machinn. Toujou dapre fondasyon an, pa gen lòt moun ki blese ni mouri nan aksidan an.Lapolis nan Johannesburg akize chofè a pou omisid dèske li tap kondui sou kou pipirit. Gen 2 jou sèlman, depi Zenani Mandela te selebre 13èm anivèsè l. Li se youn nan 9 pitit-pitit mesye Mandela--premye prezidan nwa Afrik di Sid.

Mesye Mandela te gen pou l’ te fè yon parèt toukout nan seremoni inogirasyon Mondyal la vandredi, men li deside pa patisipe nan seremoni an apre l te resevwa nouvèl lanmo pitit-pitit fi l’ la.

Pou dezyèm match inogirasyon mondyal la, Lafrans pral tope kòn li ak Uruguay nan stad Cape-Town nan—yon lòt gran vil Afrik Di Sid.

XS
SM
MD
LG