Accessibility links

Breaking News

Biwo Dwamoun l'ONU an Mande Liberasyon Prizonye Kolonbyen nan Venezuela


Logo Biwo Wo Komisarya l'ONU pou Dwamoun

Biwo Dwamoun l'ONU an nan Jenèv lanse yon apèl bay gouvènman venezuelyen an pou l mande liberasyon 59 sitwayen kolonbyen ki nan prizon o Venezuela depi plis pase 2 zan san akizasyon ofisyèl. Prizonye sa yo ap viv nan kondisyon vrè deplorab.

Prizonye yo te tonbe anba men lapolis venezuelyèn pandan yon kanpay sere-boulon otorite sekirite yo te lanse sa gen 2 zan. Biwo dwazumen Nasyon ziini an fè konnen sitiyasyon yo nan prizon an, se bagay efrayik amo. Pa egzanp, pòtpawòl biwo a, Ravina Shamdasani, fè yon deskripsyon prizon yo o Venezuela kòm “yon sitiyasyon malouk-malouk; li tèlman malouk, yon moun pa t ap jwenn vle kwè sa.”

Madam Shamdasani di “Afè de ranpli moun depase limit la, se pa pale. Kay prizon an enfeste avèk rat e aak move ti bèt. Se pa tout prizonye yo ki kapab wè limyè solèy la; e nan anpil sant detansyon atravè peyi a, se pa tout tan prizonye yo jwenn manje ak dlo; e lè yo jwenn li, se an kantite limite. Lè m di dlo a, se pa dlo pou benyen ou pou lave sèlman, non; m ap pale tou de dlo pou moun bwè…>>

Ravina Shamdasani, pòtpawòl Biwo Damoun Nasyonzini.
Ravina Shamdasani, pòtpawòl Biwo Damoun Nasyonzini.

Daprè madanm Shamdasani toujou, divès prizonye k ap soufri ak gwo maladi danjre, pa jwenn atansyon medikal yo ta merite a.

Anpil nan pwizonye yo tonbe anba akizasyon deske yo se militant kolonbyen; men, jiskarezan, otorite yo pa pote ofisyèlman okenn akizasyon ni prèv kont yo. Ravina Shamdasani ajoute:

<<Nan mwa novanm ane pase a, yon jij venezuelyen te pran yon desizyon ki te mande pou otorite yo libere tout prizonye yo san kondisyon; men otorite yo meprize lòd sila a.>>

Pòtpawòl Biwo Dwamoun l’ONU an di:

“Pou sa ki konsènen dwa entènasyonal sou dwazimen, li konsidere tou-prizon moun sa yo ap sibi a kòm yon anprizonnman abitrè; dayè militan yo deja refere afè a devan Gwoup Travay Nasyonzini kont Detansyon Abitrè. “

Biwo dwamoun l’ONU an nan Jenèv lanse apèl bay gouvènman venezuelyen an pou mande l respekte desizyon jij la te pran sa preske gen yon lane a (an novanm 2017) epi libere prizonye yo san pèdi tan. Otorite yo nan Karakas pa fè okenn kòmantè sou deklarasyon pòtpawòl l’ONU an. Sepandan mwa pase a, pandan Prezidan venezuelyen an, Nicolàs Maduro, t ap patisipe nan sesyon Asanble Jeneral Nasyon Zini an nan New York, li te lonje dwèt sou Lèzetazini ak laprès entènasyonal kòmkwa y ap envante nouvèl pou yo ka jistifye yon entèvansyon etranjè nan peyi li.

XS
SM
MD
LG