Accessibility links

Breaking News

Vyolans nan Toronto, Kanada: 2 Moun ak Yon Atakan Mouri nan Katye Greektown


Lapolis ki te ale sou plas ensidan, nan Ri Danforth, nan Toronto, Kanada, dimanch 22 jiyè 2018.
Lapolis ki te ale sou plas ensidan, nan Ri Danforth, nan Toronto, Kanada, dimanch 22 jiyè 2018.

Nan Toronto, O Kanada, otorite yo fè konnen yon nèg ki te gen yon fizi nan men li tire sou 14 moun nan sware yè dimanch-la. Bilan: li touye 2 moun epi atakan an mouri tou nan echanj kout-zam ak lapolis. Temwen fè konnen yo te ka tande ant 20 a 30 kout-zam pati nan moman atakan an tap tire sou restoran ak bar-restoran pandan li t ap deplase a-pye nan yon ri nan katye Greektown, nan Toronto.

Chèf polis Toronto a, Mark Saunders, li menm tou, deklare 2 moun mourii yo te genyen 18 tan ak 10 zan. Daprè Misye Saners, te genyen yon boukantaj kout-zam ant kèk ajan-polis ak sispèk la; anketè ap travay pou yo konnen pou ki rezon atakan an poze zak li a e yo pa ekate okenn posiblite. Nan fen apre-midi jounen lendi 23 jiyè a, otorite yo potko idantifye sispèk la; yo di tou senpleman misye te genyen 29 van.

Moun ki t ap prese kite zòn kote nèg 29 van te ouvè koutzam sou restoran ak bar-restoran nan Toronto, Kanada, dimanch 22 jiyè 2018 la..
Moun ki t ap prese kite zòn kote nèg 29 van te ouvè koutzam sou restoran ak bar-restoran nan Toronto, Kanada, dimanch 22 jiyè 2018 la..

Majistra Toronto, John Tory, bò kote pa l, fè laprès konnen fiziyad sa a se yon siyn ki montre genyen yon pwoblèm zam-a-fe ki poze nan vil la. Li di: <<Daprè mwen, gen twòp moun k ap pwomennen ak zam-a-fe nan Toronto; nou pa ta dwe gen tout moun sa yo nan rejyon nou an. Nou te tèlman abitye ak yon vil kote bagay konsa pa t konn rive! Menm lè nou te konn wè sa rive lòt kote alantou nou, nou te panse sa pa t ap janm rive isit la! >>

Premye Minis kanadyen an, Justin Trudeau, li-menm, deklare sou kont Twitter li lendi:<< Pèp Toronto a se yon pèp ki gen fòs ak kouraj, ki pa bay legen fasil e ki brav. N ap la, bò kote yo, pou n ba yo apui yo bezwen nan moman difisil sa a.>>

Nan jou ki pase yo lapolis ajoute sou kantite ajan k ap bay moun pwoteksyon nan Toronto akoz yon ogmantasyon nan zak vyolans yo. Ensidan dimanch la dewoule 3 mwa sèlman aprè yon chofè ki te sou volan yon mini-van te fonse avèk li sou yon gwoup pyeton nan pati nò vil la kote li te touye 10 moun.

XS
SM
MD
LG