Accessibility links

Breaking News

Kambòdj: Prizon Avi pou yon Ansyen Ofisyèl Rejim Khmer Wouj La


Kaing Guek Eav (alyas Doik) e ki genyen 69 lane, gen pou l pase yon santans 19 lane nan kacho

Nan Kambòdj, yon tribinal pou krim lagè k ap fonksyone ak apui Òganizasyon Nasyon Zini pase lòd pou prensipal responsab yon prizon peyi a sou ansyen rejim Khmer Wouj la, pase rès vi l nan prizon pou krim ki, daprè tribinal la, klase pami krim ki pi tèrib nan tout listwa limanite.

Desizyon sa a vin chanje yon santans ki te kondane akize a, ki rele Kaing Guek Eav (alyas Doik) e ki genyen 69 lane, pou l pase 19 lane nan kacho. Youn nan jij yo fè konnen misye dwe resevwa yon pèn ki koresponn ak krim li te komèt yo.

Jij la di:

“Akize a responsab pou detansyon, entèwogasyon, zak kraze zo, kidnapping ak egzekisyon yon gwo kantite moun ki pa t menm ennmi politik gouvènman an."

Desizyon sa a mete fen nan premye e sèl pwosè tribinal la fè e ki abouti sou yon vèdik.

Aprè jij yo te anonse desizyon an, youn nan victim yo, ki rele Bou Meng, pale ak laprès pou l di :

“Mwen satisfè 100 pou 100 avèk desizyon tribinal la. E jan pwosè a dewoule a reprezante yon egzanp pou nenpòt ki tribinal entènasyonal yo ta vle mete sou pye pou menm rezon an.“

Sepandan genyen moun ki pa fin dakò ak desizyon tribinal la; pami yo genyen kèk obsèvatyè entènasyonal ki te sou plas pou wè kijan pwosè a t ap fini.

Pa egzanp Madam Clair Duffy – k ap travay pou Inisyativ Justis pou Yon Sosyete Transparan- fè konnen sanstans la vyole dwa akize a, an palan de Kaing Guek Eav.

Daprè manmzèl, desizyon jij yo pa di sa k te rive misye Kaing Guek Eav pandan 8 tan li te pase anba men otorite militè kanbodyen yo ki te mete l nan prizon ilegalman.

Madam Duffy fè konnen:

“Yo te deja ba li yon rediksyon 5 kan sou prmeye santans la poutèt yo te vyole dwa li; e menm jij yo te dakò ak premye desizyon sa a. Men, nou wè majorite jij yo jounen jodiya –sitou jij kanbodyen yo ak youn nan kòlèg etranje ki vote nan menm sans avèk yo-- ebyen, jij yo pa di anyen sou desizyon tribinal te pran anvan an."

Depi yo te kreye tribinal krim de gè sa a an 2005, li depanse anviwon 200 milyon dola e li tonbe anba akizasyon dèske li sede anba presyon politik pou l limite kantite pwosè li ta dwe fè.

XS
SM
MD
LG