Accessibility links

Breaking News

Jounalis VOA Carolyn Presutti Rankontre Prezidan Martelly ak Premye Minis Ratifye Conille


Prezidan ayisyen an Michel Joseph Martelly

Nan yon entèvyou nan lang anglè Prezidan Michel Martelly ak Premye Minis ratifye ayisyen an, Dr. Garry Conille, bay jounalis VOA Carolyn Presutti, yo abòde divès sijè ki gen rapò ak sitiyasyon an nan peyi Dayiti.

Youn nan kesyon Carolyn te poze Misye Martelly konsènen presyon kap fèt depi kèk tan pou Misyon Mentyen lapè l’ONU an (MINUSTAH) kite peyi a.

Prezidan Martelly di:

"L’ONU isit la, MINUSTAH isit la paske nou bezwen yo pou yo mentni lapè nan peyi a; se objektif misyon an. Kounyela a, pou nou mande yo ale san nou pa genyen yon altènativ, se kòmsi nou ta vle ekspoze Ayiti anba yon lòt kriz.

Alos, mwen menm, mwen pa ta lanse lide pou sa fèt konsa. Ayisyen yo, yo menm, pa ta renmen wè se etranje kap bay sekirite nan peyi a; yo ta pi pito wè ayisyen fè travay sa a; epi la a, n ap pale tou de kreyasyon travay.

Alòs, poukisa se pa Ayisyen k ap fè travay la? Pwoblèm nan sè ke, anvan nou rive la, nou fèt pou n planifye, nou fèt pou n kreye yon fòs defans ki dwe resevwa fòmasyon apwopriye a, anvan pou yo kapab ranplase MINUSTAH. "

Bò kote pa l, Doktè Garry Conille pale, antwòt, de travay ki te fèt pandan tout pwosesis ki debouche sou vòt 2 chanm palman an ki, finalman, ratifye nominasyon n kòm nouvo Premye Minis peyi Dayiti.

Misye Conille di jounalis Lavwadmalerik la:

“Sete yon wout byen long, difisil, men esktrèmman enteresan. Li te ban m okazyon pou m rankontre anpil moun, pou m tande anpil moun; mwen te gen anpil rankont ak pi fò manm palman an, ak Sena a, Sosyete Sivil la, pati politik yo.

Mwen panse tou, apre sa k te pase ak 2 premye chwa Prezidan Martelly te fè yo, anpil moun te vle asire yo mwen kapab kreye anviwonnman ki nesesè pou Sektè Prive a fè envestisman, mwen pa tap pran okenn pozisyon ki twò ekstrèm, mwen se yon moun yo kapab konsidere kòm yon patnè.

Yo te vle konnen yo kapab jwenn tout garanti sa yo nan men m. Kidonk, nou tout te pran okazyon an pou nou rankontre, pou nou chita ansanm e pou n pale."

Prezidan Michel Martelly ak Premye Minis konfime a, Doktè Garry Conille, te abòde tou avèk Carolyn Presutti divès lòt dosye, tankou pwogram edikasyon gratis pou tout ti Ayisyen Prezidan Martelly lanse a, ak diferan defi k ap tann gouvènman Misye Conille pral fòme a.

XS
SM
MD
LG