Accessibility links

Pri Swen Sante k ap Ogmante Afekte Popilasyon Mondyal la

  • Jean Robert Philippe

Pri Swen Sante k ap Ogmante Afekte Popilasyon Mondyal la

Òganizasyon an, ki baze nan vil Jenèv an Swis, pwopoze kèk gid gouvènman yo dwe swiv pou ogmante finansman sistèm sante peyi yo e pèmèt plis moun ka jwenn sèvis sante.

Dapre rapò òganizasyon mondyal la anviwon yon milya moun sou planèt la pa ka jwenn sèvis sante yo bezwen. Yon ti minorite moun sèlman gen bon plan sante ki kouvri pifò depans-yo.

Direktè Finansman Sistèm Sante nan Òganizasyon Mondyal lasante a David Evans di majorite moun gen yon chwa difisil pou yo fè. Yo kapab peye sèvis sante yo ak lajan nan pòch yo ou byen rete tann pi lontan ak posibilite pou yo trape yon maladi pi grav.

Dapre òganizasyon an, gouvènman yo kapab kolekte lajan yon fason ki plis fè sans e depanse l ak pi bon kontwol. OMS fè remake ke nan ane 2000 chèf leta afriken yo te pran angajman pou depanse 15 pou 100 nan bidjè yo nan domèn sante. Jiska prezan se sèlman 3 peyi ki kenbe pwomès la : Liberya, Rwanda ak Tanzani.

Rapò a di si gouvènman yo byen depanse lajan-yo, sa kapab pèmèt lemond depanse ant 20 a 40 pousan plis lajan pou kouvri swen sante. Rapò a site ekzanp la Frans ki sèvi ak medikaman jenerik ki koute mwen chè e ki te pèmèt peyi a ekonomize prèske 2 milya dola pou ane 2008 la. Rapò a di depans byen kontwole nan lopital yo ka pèmèt yo bay 15 pousan plis sèvis.

Òganizasyon an rekonèt mizè ak katastròf finansye touche plis popilasyon nan peyi pòv yo paske moun sa yo oblije rale lajan nan pòch yo pou yo peye swen sante. Konsa, dapre sa l di, peyi pòv yo pwal bezwen plis asistans nan kominote entènasyonal la.

XS
SM
MD
LG