Militan k ap defann dwa ayisyen ak imigran Ozetazini apiye apèl ki pral jwenn Prezidan Donald Trump pou mande l mete fen nan separasyon timoun imigran ak paran yo ki rive ilegalman sou fwontyè peyi a avèk Meksik; an menm tan tou, yo mande Kongrè a ak adminis-trasyon Trump la travay pou yo jwenn yon solisyon pèmanan pou sitiyasyon anviwon 300 mil imigran ki anba menas pou yo vin ilegal nan peyi a akoz desizyon gouvènman federal la pran pou l mete fen nan Stati Pwoteksyon Tanporè a (TPS).
Nan yon atik Jacqueline Charles ekri e ki ki parèt nan jounal Miami Herald, li lanse yon apèl kote li raple, pandan 12 mwa ki pase yo, Depatman Sekirite Enteryè Lèzetazini an anonse li pral anile TPS la ki ofri pwoteksyon kont depòtasyon pou imigran 6 peyi -Soudan, Nikaragwa, Ayiti, Nepal, Salvadò avèk Ondiras- nan moman Prezidan Trump ap fè presyon pou l mete an aplikasyon yon politik imigrasyon ki menase anpil imigran.
Sa pa gen lontan --aprè plizyè vwa te leve atravè Lèzetazini pou denonse yon politik zewo tolerans Prezidan Trump tap aplike e ki te mache ak separasyon fanmi-- lidè ameriken an te siyen yon dekrè ki pote yon fen nan politik sa a. Malgre sa, vè vandredi 22 jen 2018 la, anviwon 2 mil 300 timoun ki separe ak paran yo t ap viv nan azil ak mezon parenaj atravè tout peyi a, tankou nan pati sid Eta Florid kote militan yo òganize manifestasyon pou yo denonse tretman ti imigran yo resevwa aprè reprezantan Eta a nan Kongrè a te vizite yon enstalasyon kote yo mete ti moun sa yo.
Militan yo di yo konsidere sitiyasyon sa a menm jan ak desizyonn otorite ameriken yo pran pou yo mete fen nan TPS la. Marleine Bastien se youn nan militan sa yo e direktris Fanm Ayisyèn nan Miami; li fè konnen: “Lè nou gade sa k ap pase sou fwontyè a, sa fè nou wè kijan sa pral pase” pou moun ki posede TPS yo.