Siklòn Lane menase pou l frape dirèkteman Hawaii jedi 23 out 2018 la pandan lekòl yo, biznis ak biwo leta yo fèmen e pandan moun nan zile a fè depo manje e bouche pòt ak fenèt-yo lakay yo.
Otorite yo ouvè abri depi mèkredi 22 out la nan sak rele Gwo Zile a e sou zile Maui, Molokai ak Lanai. Administratè Ajans pou Jere Sekou, Tom Davis, fè konnen pa gen ase abri nan tout eta a e li ekzòte moun ki an deyò zòn inondasyon yo pou yo rete lakay yo.
Tanpèt la mache ak van ki gen vitès jiska 230 kilomèt alè, e yon fòs ki varye ant kategori 4 ak 5. Prezidan Donald Trump deklare eta dijans yè mèkredi a pou Hawaii.