Accessibility links

Ayiti: Majistra Nice Simon Mande nan Priyè li ‘Benediksyon pou Komin Taba’

  • Ekip Sèvis Kreyòl VOA

Majistra Taba a, Nice Simon, nan mitan ak frè Jimmy Albert nan lakou meri Taba a nan yon seremoni senbolik kote li tap remèt kle komin nan bay sen Notre Dame de Fatima, 11 oktòb 2017, Taba, Pòtoprens, Ayiti.

Prezidan Konsèy Kominal Taba a, Nice Simon, di li remèt senbolikman kle komin lan bay sen ki pote non: "Notre Dame de Fatima" a nan kad pelerinaj yo fè konnen sen sa ap fè nan plizyè komin nan peyi Dayiti.

Jès senbolik sa te reyalize an prezans komite Karavann Pelerinaj la sou direksyon frè Jimmy Albert nan lakou meri Taba a kote sen an te prezan avan yo te rann yo nan kafou Bit Bwaye pou te koumanse sèvis posesyon an.

Se plizyè milye fidèl katolik ki sòti nan diferan kwen nan komin lan ki te vin patisipe nan mach pelerinaj sa a.

Kretyen katolik yo nan Taba kap mache nan yon priyè posesyon nan komin nan, 11 oktòb 2017.
Kretyen katolik yo nan Taba kap mache nan yon priyè posesyon nan komin nan, 11 oktòb 2017.

Tankou anpil obsèvatè te ka remake sa a, se avèk respè ak imilite majistra Nice Simon avèk plizyè pèsonèl nan ekip li a te resevwa epi kondwi seremoni pelerinaj Notre Dame de Fatima a sòti depi kafou Bit Bwaye a pou rive nan legliz katolik Egzaltasyon Sent Kwa a nan Kwadèmisyon.

Dapre kwayan yo, Notre Dame de Fatima sou 8èm vwayaj pelerinaj li nan peyi Dayiti depi li fin kite peyi Etazini, e nan priyè li, Majistra Simon mande, “Manman Fatima pou l beni, pwoteje ak fè pwospere Taba pou byennèt tout sitwayen kap viv epi kap mennen aktivite sosyal ak ekonomik nan komin sila a.”

XS
SM
MD
LG