Responsab Komisyon Sekirite, Jistis ak Defans Sena a, Renel Senatus mande Minis Jistis la, Heidi Fortune, pou l fè Komisè gouvènman Pòtoprens la Mèt Ocname Clamé Dameus leve mezi entèdiksyon li mete kont ansyen minis finans Yves Bastien ak ansyen minis jistis Mèt Camille Edouard Junior.
Demand sa a fèt pandan yon rankont komisyon an te genyen ak responsab lajistis yo dapre Senatè Senatus ki te pale ak laprès. Mèt Clamé Dameus deklare sou bò pa l rezon ki fè l mete entèdiskyon depa kont 2 ansyen minis yo se akoz li pa konnen adrès yo.
Komisè a di li vle kesyone 2 ansyen minis yo sou lajan kontra leta ayisyen te siyen ak yon antrepriz etranje pou travay ki pa janm fèt epi fon lajan pou fonksyonman sistèm penitansye peyi a. Sepandan, 2 ansyen minis yo konsidere desizyon komisè gouvènman an kòm zak ilegal.
Ann reyaksyon a desizyon komisè gouvènman an, Pastè Edouard Paultre, responsab Konsèy Nasyonal Aktè Non-Etatik yo (CONANE) kwè chèf pakè Pòtoprens la montre aklè l ap travay pou pouvwa an plas la olye pou l defann sosyete a.