Yon ansyen edikatè ayisyen kap viv nan Boston Masachousèt bat bravo lakontantman pou lwa sou Fon Nasyonal Edikasyon an (FNE) dapre korespondans Lavwadlamerik Wilson Dubuisson.
Charlie Péant, ki te konn anseye ann Ayiti avan li te vin viv Ozetazini di li konsidere lwa sou edikasyon an kòm yon pa ann avan nan yon bon direksyon pou sistèm edikatif la nan peyi a. Mesye Péant di tou li espere fwa sa a pral gen bon jan transparans nan fason dirijan ayisyen yo ap itilize lajan yo pran sou transfè kap soti nan dyaspora ak sou apèl telefonik lòt bò dlo yo.
Ansyen pwofesè matematik ak chimi an espere responsab konsène yo pran dispozisyon pou peye pwofesè kap travay ki pa janm touche yo epi entegre lòt anseyan ki kalifye nan sistèm nan pou yon pi bon edikasyon pou timoun yo kap grandi ann Ayiti.
Desizyon pou mete yon fon pou devlope sistèm edikatif la ann Ayiti te pran sou gouvènman Michel Martelly a. Sepandan, pat janm gen yon lwa ki te vote sou finansman fon sa a ki kreye avèk taks gouvènman ayisyen pran sou transfè lajan kap antre nan peyi a.
Anpil obsèvatè te toujou ap kesyone lejitimite ak itilizasyon fon sa yo panse ki ta sipoze jwenn pwobasyon pouvwa lejislatif la. Dapre nouvèl yo, Chanm depite a te vote pwojè lwa FNE depi nan mwa dout 2012 pandan ke Sena rive vote li an jiyè 2017.
Klike sou lyen odyo a pou w tande deklarasyon pwofesè Charlie Péant nan mikwo Wilson Dubuisson.
