Accessibility links

Breaking News

Foutbòl: Yon Lòt Kout Je Sou Koup Dimond Afrik di Sid la


—Federasyon foutbòl brezilyen an revoke antrenè seleksyon nasyonal la, Dunga, apre Brezil elimine nan ka de final koup dimond la nan Afrik di Sid. Responsab federasyon an fè konnen yap ranplase tout ekip teknik la nan fen mwa jiyè a. N ap raple ke Brezil pral òganize 20èm edisyon koup dimond la an 2014.

—Seleksyon nasyonal Ajantin nan retounen nan peyi l anba gwo mezi sekirite. Plizyè milye fanatik te kanpe sou 2 ran pou salye retou jwè ajanten yo malgre gwo defèt yo sibi devan seleksyon Almay nan. Fanatik yo di yo kontinye apiye Maradona e yo swete li pral kontinye antrene seleksyon an. Dayè, plizyè jwè mande Maradona pou l rete nan tèt seleksyon an. Dènye nouvèl yo fè konnen Maradona anonse l ap bay demisyon l kòm antrenè.

—FIFA bay otorite Nijeryan yo jodi a jiska 6 zè pou yo retounen sou yon desizyon gouvènman an pran pou l mete seleksyon nasyonal la anba yon sispansyon ki ta anpeche l patisipe nan aktivite entènasyonal pandan 2 zan. Si otorite yo nan Nijerya pa konfòme yo avèk iltimatòm sa a, FIFA ap sispann federasyon an. FIFA entèdi entèvansyon tout gouvènman nan zafè foutbòl. Yon lòt kote, federasyon foubòl Nijeryan an revoke 2 manm komite ekzekitif la ak yon manm pèsonèl teknik la nan kad efò federasyon an ap deplwaye pou l eseye kalme kòlè prezidan Goodluck Jonhatan. Responsab yo mande prezidan an retounen sou desizyon gouvènman l nan pran pou l anpeche seleksyon nasyonal la patisipe nan konpetisyon entènasyonal pandan 2 zan.Nouvèl ki fèk tonbe fè konnen mesye Jonhatan retounen sou desizyon an e li leve entèdiksyon an.

—Popilasyon Afrik di Sid la te òganize yon parad pou salye depa seleksyon Gana a ki rate yon chans pou l te kalifye pou semi final koup dimond la apre Irigwe elimine li sou chout penalite nan ka de final la. Ganeyen yo fè konnen yo t al reprezante peyi yo, men yo fini koup di mond kòm reprezantan kontinan afriken an.

—4 seleksyon nasyonal nan kous pou ranpòte 19èm edisyon koup dimond la an Afrik di Sid. Almay, ki pase Ajantin yon katon 4 a 0, pral rankontre ak Espay ki elimine Paragwe sou yon skò tou mens 1 a 0. Rankont Almay-Espay la fikse pou mèkredi 7 jiyè a. Demen madi a La Oland, ki bat Brezil sou yon skò 2 a 1, ap rankontre Irigwe ki elimine Gana sou penalite.

—Antrenè onz nasyonal alman an, Joachim Low, deklare lendi 5 jiyè a, jwè seleksyon an ta dwe an fòm lè yo pral monte teren an devan ekip espayòl la. Dapre ansyen kapitèn seleksyon alman an, Franz Beckenbauer , pèfòmans jwè yo nan koup dimond la depase tout esperans dirijan yo ak fanatik yo.Yon lòt kote, jwè alman Miroslav Klose sou wout pou egalize ou depase pi gwo kantite gòl yon foutbòlè make nan listwa koup dimond lan; se brezilyen Ronaldo ki geneyn rekò sa a jiska prezan pou kantite gòl li make nan mondyal yo pandan tout karyè li. 2 gòl Klose make nan rankont Almay-Ajantin nan ba li yon total 14 gòl, swa yon gòl dèyè Ronaldo ki te make 15 gòl pandan patisipasyon l nan chanpyona mondyal yo. Klose ap patisipe nan 3èm koup dimond li.

—2 gran pri foutbòl mondyal ( meyè jwè mondyal ak balon dò eropeyen) pap ekziste a pati Janvye 2011. Nouvo pri a pral rele Balon Dò FIFA, dapre yon antant ant FIFA ak Frans Foutbòl.

XS
SM
MD
LG