Ozetazini, responsab eleksyon yo kontinye ap konte vwa toujou 8 jou aprè pèp la te sòti al vote nan tout peyi a pou yo chwazi tout manm Chanm Depite a, yon tyè manm Sena a, epi, antwot, gouvènè pi fò nan 50 Eta yo ak majistra kominal plizyè vil.
Yon jou aprè eleksyon yo te dewoule madi 6 novanm nan, Prezidan Donald Trump ki t ap pale nan La Mezon Blanch, te deklare:
<<Jounen eleksyon yo, jounen yè madi a, sete yon gran jou. Pati Repibliken an rive defye listwa avèk yon rezilta kote li ogmante kantite syèj li te genyen nan Sena a; tandiske, an menm tan, kandida pati a jwenn mwayen ranpòte plis plas nan Chanm Bas la pase sa anpil moun te espere. Timiyèt viktwa sa a t ap yon viktwa total.>>
Nan fen aprè-midi jounan 14 novanm nan, te toujou genyen 2 plas senatè an diskisyon, paske otorite elektoral yo poko ka deside ki pati ki ranpòte yo. Se pòs senatè Eta Florid ak Mississippi. Ann atandan, Repibliken yo gen garanti yo deja ranpòte 2 manm an plis nan Gran kò a. Nan Chanm Depite a, se yon viktwa wo-lamen Demokrat yo ranpòte.