Accessibility links

Breaking News

Etazini Pral Patisipe nan Rankont Kanada sou Ayiti a


Asistan Sekrete Deta pou Zafe Emisfe Oksidantal yo Brian Nichols pale pandan yon konferans de pres nan Anbasad Ameriken Potoprens, 1 Oct. 2021.

Sekretè d'Eta adjwen Ameriken Brian Nichols fè konnen Lèzetazini kontan patisipe nan yon rankont virtyèl Kanada ap òganize Vandredi 21 Janvye a pou diskite sou Ayiti.

Nichols deklare nan yon tweet li pibliye sou kont ofisyèl Twitter li a, Mèkredi."Nou kanpe fèm dèyè pèp Ayisyen an pandan yap travay pou yon avni kote gen plis sekirite, demokrasi ak kwasans ekonomik,"


Minis Afè Etranje Kanada a, Melanie Joly te anonse rankont la Madi sou kont ofisyèl Ministè Afè Etranjè Kanadyen an. Responsab Ayisyen ak manm kominote entènasyonal la pral patisipe nan rankont la kote yap eseye jwenn solisyon pou defi ki poze pou Ayiti.

"Kanada ak Ayiti ini gras ak yon amitye pwofon ak pwoch kolaborasyon. Antanke zanmi ansyen, Kanada pare pou'l apiye solisyon Ayisyen dirije pou rezoud pwoblèm pi ijan peyi a e nou kontinye pran angajman pou apiye Ayiti pou'l ka gen yon avni kote ki gen demokrasi, sekirite ak kwasans ekonomik," Madan Joly deklare.

Premye Minis Justin Trudeau pral louvri rankont la ansanm ak Premye Minis Ayisyen an, Ariel Henry.

Dapre nòt pou laprès ministè a, rankont sa a prezante yon opòtinite pou responsab Ayisyen, minis afè etranje lòt peyi demokratik ak reprezantan oganizasyon miltilateral yo pami yo Nasyonzini, Kominote Karayib la (CARICOM) epi Oganizasyon La Francophonie ak Oganizasyon Eta Ameriken yo (L'OEA) jwenn solisyon vyab ak enklizif pou defi Ayiti ak pèp Ayisyen an genyen devan yo.

Minis Joly ap akonpaye pa Minis Devlopman Entènasyonal Harjit S. Sajjan ki responsab pou Ajans Devlopman Pasifik Ekonomik Kanada. Yo pral mete aksan dapre deklarasyon ministè a sou kowoperasyon rejyonal ak entènasyonal pou apiye Ayiti.

Kanada te tabli relasyon diplomatik ak Ayiti an 1954. Gen plis pase 165,000 Ayisyen kap viv Kanada kounyea.

Kanada se dezyèm pi gran donatè bilateral pou Ayiti apre Etazini. Depi tranblamanntè 2010 la, Kanada bay Ayiti $1.8 milya dola asistans.

XS
SM
MD
LG