Accessibility links

Etazini-Politik : Demokrat ak Repibliken gen Opinyon Depaman sou Mache Travay la

  • VOA Nouvèl

Prezidan Ameriken Barack Obama

Ozetazini, La Mezon Blanch bat bravo pou nouvèl ki fèk parèt e ki di mache travay ameriken an anrejistre kèk amelyorasyon, tandiske kandida repibliken pou plas prezidan an kontinye lonje dwèt sou Prezidan Barack Obama pou move pèfòmans dekonomi an.

Aprè mache-d-labous la te reyaji pozitivman vandredi pase a sou nouvèl ki te anonse amelyorasyon sou mache travay la, Misye Obama te pale de pwogrè sa a lè l te di:

“Nan mwa janvye a biznis ameriken yo te ajoute 257 mil dyòb sou mache a. To chomaj la bese, paske plis moun jwenn travay. An tou, nou ajoute 3 milyon 700 mil travay sou mache a pandan 23 mwa ki pase yo.”

Ki repons nou jwenn bò kote kandida republiken ki vle repran La Mezon Blanch nan men Prezidan Obama? Eben, yo di amelyorasyon sa a rive twò ta e li twò piti. Kandida ki devan nan kous la, ansyen gouvènè Eta Massachusetts la, Mitt Romney, te abòde dosye a pandan li t ap pale ak yon foul nan vil Las Vegas apre viktwa Ii ranpòte samdi nan asanble elektoral eta Nevada a.

Misye Romney deklare:

“Semèn sa a Misye Obama te eseye pran merit la poutèt to chomaj la bese rive nan nivo 8 vigil 3. Pa si vit, Misye Prezidan: sa fè 36 mwa youn apre lòt depi to chomaj la rete nan yon nivo ki pi wo pase chif pwòp administrasyon w nan te fikse a: swa 8 pou san sèlman.“

Men, teknik Prezidan Obama ap itilize nan kanpay pou re-eleksyon n nan, se pibliye bon nouvèl ki parèt sou ekonomi an ak lot domèn, tandiske li di gen efò ki pou rete pou fèt toujou pou sitiyasyon an kontinye ameryore.

Misye Obama fè konnen:

“Toujou genyen twòp ameriken ki bezwen travay oubyen yon travay ki peye pi byen pase lajan y ap touche jounen jodi a. Men, ekonomi an ap pran jarèt. Relans ekonomik la ap avanse. E nou dwe fèt tout sa n kapab pou n ede l kontinye avanse."

Konpayi ki fè sondaj dopinyon yo di yo remake yon tandans kote to popilarite Prezidan Obama ap monte; e sa genyen yon rapò sere-sere ak pwogrè ki fèt resaman nan ekonomi amerikèn nan.

XS
SM
MD
LG